ВИЗУВ ЛЯГЕЙЯС

Гожӧм пансигӧн ми вӧчим участокын неыджыд пруд-бассейн. Кодйим гу, вольсалім кыз плёнка, тэчим изъяс, кисьтім ва. Вӧчим ставсӧ кыдзи колӧ. Колис виччысьлыны жар поводдясӧ: ваыс гож водзас бура шоналас, и позяс пӧттӧдз купайтчыны.

Мӧд луннас миян прудӧ воисны олысьяс — кыз рушкуа кык лягей. Ми колим налы ваас важ дзоля улӧслысь крепыд пуклӧссӧ, и турунвиж гожйӧдчысьяс сюся кавшасьлісны серӧдӧм пӧв вылӧ да шонтісны нюдзвиж мышнысӧ шонді водзын. Найӧ прамӧй дачникъяс моз кузь лунтыр пукалісны шезлонг вылын либӧ уялісны кокнас йӧткасьӧмӧн. Миянысь мыйлакӧ полісны да ас дораныс матӧ эз сибӧдны. Аслыным, збыльысь кӧ нин шуны, эз ёна окота вӧв кӧдзыд ваӧ лягейяс дорӧ пырны. Вот жармас, и сэки нин ог юасьӧй. Бассейнсӧ ӧд эг налы лӧсьӧдӧй.

Кор дачаӧ вайим каньӧс, коньӧр лягейяс сэтшӧм тэрыба тривксьӧдісны бассейнысь — ӧтиыс ӧтарӧ, мӧдыс мӧдарӧ, мый Мурашка кань тшук эз кӧсӧймы. Сійӧ некор на эз аддзывлы былькъя синма турунвиж шыръястӧ. Дыр эськӧ кытшлаліс бассейн дорышӧд. И ваӧ оз лысьт лэччынысӧ, тшупӧдъясыс вильыдӧсь да, и тӧдны телепит, мыйсяма бӧжтӧм дивӧяс сылы паныдасисны? А друг кӧ бара кодкӧ чеччыштас?

Но сэсся вильыш каньӧс пондісны котрӧдлыны юрсигусьяс да чиркъяс, и вӧтлысигад лягейясыс вунісны. А вутшкысь ичмоньяс миян дорӧ арнас волісны. Ми морков идралам, а найӧ градъяс вомӧн чеччалӧны. Ог тӧд эськӧ, сійӧ жӧ лягейясыс абу. Найӧ ӧд ставныс ӧткодь ныр-вомаӧсь.