ТШАП ЧИПАН

Морков град весалӧм бӧрын ме шуи вайны чипанъяслы нявда, мед чӧсмасясны. Мый град йӧрын ёг, налы — бур. Вӧр-ваын ковтӧмторйыс оз овлы. Весиг ёгтурун ассьыс донсӧ тӧдӧ. И со, курӧг поз дорӧ матыстчигӧн кыла: ӧти чипан зэв гораа клуткӧ, быттьӧ ыджыд мог суӧма. Мый бара лоис-а? А сійӧ вӧлӧм кольк вайӧма. Сулалӧ чипаныд ӧти кок вылас, мӧдсӧ рушку дорас лэптӧма, лӧсьӧдчӧма воськовтны да, буракӧ, оз тӧд, кодарӧ мунны: шуйгавылӧ либӧ веськыдвылӧ. Сьӧкыд бӧрйынысӧ. Поз пельӧсъясын сулалӧ кос турун тыра кык кӧрӧб. Чужтан юкӧн, позьӧ шуны. И тшап чипан этадзи синсӧ налань чӧвтлӧ. Орччӧн кык курӧг мунісны да пуксисны кӧрӧбъяс вылӧ. А ыджыд гӧлӧсаыд ӧтарӧ сулалӧ да мудзлытӧг клуткӧ.

Минут вит ме олі позйын: веж турунӧн ставнысӧ чӧсмӧдлі, шыдӧссӧ содтышті, васӧ кисьтышті, а тшапыд мелань эз и видзӧдлы. Оз сёйсьы, кӧнкӧ, сылы. И век на дольӧ: «код-кодарӧ, код-кодарӧ?» Зэв эськӧ окота вӧлі тӧдмавны, мый водзӧ лоас, но ковмис петны: град йӧрын уджыс оз виччысь.

Но чипанъяслы аттьӧ. Сійӧ гожӧмнас вердісны миянӧс пӧттӧдз. Сэтшӧм чӧскыд колькйыс сэсся некӧн абу. Но и ми зілим налы радейтана турунсӧ, и сотысь петшӧрсӧ тшӧтш нетшкыны, гуляйтны лэдзлывлім, познысӧ весалім. Быдторйысь аттьӧавны колӧ. Бур кузя бурӧн. Кыдзи нӧ мӧд ногсӧ?