ВӦРСА МОДЕЛЬ

Ӧти гожся жар лунӧ миянлы окота лоис ветлыны пожӧма ягӧ. Воыс вӧлі гӧль, тшакыс сюрласис гежӧда, кызвынсӧ веськалісны сырзьӧм, ротас бӧждора уртшакъяс. Наӧн чӧсмасьлӧны тшыгъялӧм пемӧсъяс. Вӧрын сулаліс чӧв-лӧнь, и сійӧс видзисны джуджыдсьыс-джуджыд пожӧмъяс. Кокньыдик тӧвруысь, а гашкӧ, и пӧрысьлунысь, муӧ шочиника лэбисны нэриник емъяс, эз вермыны чорыд увъяс вылын ӧшавны да.

Виччысьтӧг пода туй вылӧ чепӧсйис ур. Донъялӧмӧн видзӧдліс миян вылӧ, быттьӧ юасис, мыйла пӧ татчӧ кыссинныд; чеччыштіс пу вылӧ метр кык вылна и сэтісянь куш кӧрзинаясӧ дзоркнитлӧ. Мый сылы колӧ? Нылукӧй, гажыс петіс да, пуктіс пу дорӧ ӧти масленик. Дыр эз лэччы урыд. И кыдз тай лыйыштас! Ме фотоаппаратӧс нин перйи — и сы бӧрся. Ок, дыр жӧ менӧ вӧрӧдыс котрӧдліс! Верӧсӧй нывкӧд сы коста аддзисны пражитмӧн некымын лисичка да виж гоб. Гортӧ чуксалӧны. А ме вӧрзьыны ог вермы. Урыс быттьӧ синмӧс пӧртӧма. Чатӧртыштас ныр-вомсӧ, кӧсӧйтчыштас, лэдзас матыстчыны, гӧрд бӧжсӧ пашкыртас, юрсӧ мичаника бергӧдас — тшолкнит, фотограф.

Сӧмын на удита стоп-кадр вылӧ личкыштны, урыд бара юр ни бӧж лэбзьӧ, нитш кузя либӧ пуысь пуӧ чеччалӧ. Пӧттӧдз вӧтлыси сы бӧрся... Бӧръяпомыс бара жӧ сійӧ местаас петі, кӧні «моделькӧд» медводдзаысьсӧ ныр на ныр зурасим. А сэні вӧлӧм дзонь клад заптӧма: некымын коль, еджыд гоб, кутшӧмкӧ чукрасьӧм тшакъяс. Урыд, буракӧ, буретш лӧсьӧдчис ассьыс озырлунсӧ, тӧвся нурсӧ, горсъяс кыпӧдны, да ми торким.

Корим прӧща сылысь да гортӧ кокни сьӧлӧмӧн мӧдім. И вӧрса олыськӧд тӧдмасим, и асьнымӧс эг удзӧдӧй. Ӧти косьмӧм виж гоб пуктім, чӧсмась, ур. А паметь вылӧ коли снимок. Ог тӧд, казьтылӧ оз миянӧс урыс. Миянлы тай дум вылӧ усьлӧ-а. Со кутшӧм сійӧ — пожӧм вож сайсянь мыччасьӧ. Мича ӧд?