ПЫШЪЯЛЫСЬ ЧАЙ

Ӧтчыд гожӧмнас ме гӧститі пӧдруга дорын Таджикистанын. Вӧлі сэні медводдзаысь, и ставыс менӧ чуймӧдліс: и серакотша паськыд платтьӧяс, и тюбетейкаяс, и мыла тӧдтӧм кыв.

Коркӧ коли ӧтнамӧн да шуи мыськавны джодж. Кухняысь, плита сайысь, аддзи мыльктор — чай корйыс киссьӧма. Тыдалӧ, кӧзяеваӧй вунӧдӧмаӧсь плита дорышас восьса чай пачкасӧ да тӧдлытӧгыс пӧрӧдӧмаӧсь. Сьӧд мылькторйыс шыльыд, пельк, быттьӧ сибырса дзоляммӧдӧм кодзувкоткар. Дыр думайттӧг чышкышті сійӧс тэльӧбӧ. А синмӧй, нинӧм ог шу, лёка аддзӧ. Сы пыдди юрӧй бура уджалӧ. И кор чай коръясыс кутісны пышъявны ӧтарӧ-мӧдарӧ, повзьӧмла пыр и думышті: мися, азияса сотан шонді водзад висьми. Ковмас шойччыштны.

Вугралышті час джын кымын да бӧр локті кухняӧ. Плита саяд видзӧдлі — чай мылькторйыд бара быдмӧма, быттьӧ ме эг и чышкыв сійӧс. Каститчис ӧмӧй? Босьті тэльӧб, гӧликӧн ӧвтышті, а чай коръясыд бара ӧтарӧ-мӧдарӧ триньксьӧдісны! Татчӧ ме садьӧс тшук эг вошты. Ӧдва-ӧдва пӧдругаӧс удж вывсьыс верми виччысьны. Ачым ӧтторъя плита сайӧ кыйкъяла. Сэн на мылькторйыс либӧ вуджис нин кытчӧкӧ?

Локтіс Светка. Сералӧ ме вылын. Вӧлӧмкӧ, тайӧ налӧн гортса кодзувкотъяс. Некод найӧс абу вайӧма. Асьныс локтӧмаӧсь.

Со кыдзи. Миян дорӧ чераньяс да горзысь тӧрӧканъяс гортӧ пыравлӧны. А налӧн кодзувкотъяс плита саяныс олӧны. Светалӧн бать-мамыс ме вылын отпускалігчӧж сералісны. А кор локтісны гӧститны ме дорӧ лымъя Сибырӧ, налы сьыліс пач сайын олысь тӧрӧкан. Ёна и шензисны!