ДИВӦ-КЫМӦР

Менам челядьдырысь медся шензьӧдана серпас — польдӧм кымӧр. Ми сулалім мамкӧд видз вылын. А кымӧрыс шлывгис дзик орччӧн. Ме судзӧдчылі, кӧсйи инмӧдчывны дорышас... Эг удит. Век на син водзын: пӧлӧс зэрыс лэбӧ кымӧр бӧж моз, кытчӧ тӧлыс нуас. Сэсся тэрмасьӧмӧн кывтӧ миян дорті ылыс видзлань. Кӧнкӧ, гожся турунсӧ мӧдӧ киськавны. Либӧ жӧ миян радейтана озъя кушинӧ кежас. Кытысь бара-й татшӧмыс усис? Чӧскыд кӧра, шондіа лун — и кымӧр!

Тайӧ дивӧыс югыд би моз овмӧдчис менам сьӧлӧмӧ. Овлӧ тай: мыйкӧ весьӧпӧртас тэнӧ, но дзикӧдзсӧ оз и воссьы. Сэки ме быттьӧ кыйкнитлі енэж кудйӧ: сійӧ костасьліс да лэдзис дзоляник вильыш кымӧрӧс. А кымӧрыд збоя гӧгыльтчис ме дорті, тайкӧ эз нӧбӧд. Гашкӧ, кӧсйис индыны меным туй? Но кытчӧ?..

Сэксянь ме сюся кывзыся вӧр-валӧн лов шыӧ, быдторсӧ зіля казявны. Миян дорті шлывгысь зэр — кык енъюгыдлӧн пас, гажлӧн да шоглӧн, шонді югӧрлӧн да сӧдз синвалӧн. Дзоля кымӧр, кӧнкӧ, видзаасис миянкӧд да сиис бур туй...

Уна во колис. Вӧр-ваысь быдсяма дивӧсӧ аддзылі, весиг гӧра весьтын гылалысь кодзувъяс. Но зэрыс сэсся ме дорті некор эз шлывкнитлы. И ни ӧти тӧдсалы татшӧм кымӧрыс эз петкӧдчывлы. Гашкӧ, тіянлы мойвиас?