* * *

Кор часі мудзис точкыны да ӧвсис —
Сэк керка пытшкын лои шы ни гу.
Сьӧд рытыс ывла вылас сэсся вӧрзис,
Кунь-каньӧн пырис гортӧ, быттьӧ ру.
Кын ӧшиньясӧ кыйялӧмӧн, дыша,
Пач сайӧ водас — быттьӧ эз и вӧв.
Дерт, кӧнкӧ, гажтӧм рӧма сылӧн кышӧд.
Чунь ӧтка морт лов рӧма.
Усьлам чӧв.
Ми кыкӧн. Битӧг пукалам, — и шытӧг.
Бан бокам ньӧжйӧ пӧльышталӧ рыт.
Куш ме да сійӧ.
Чепӧсйыны эськӧ
Мен кильчӧ вылӧ шога горзігтыр
Да омлялыштны сэні гӧлӧс быртӧдз,
Став синва кисьтны сувтса зэрыс моз, —
И мунны клубӧ,
Гажӧдчыны усьтӧдз!
Ок, кутшӧм бур, мый менам абу гоз.
И мый кӧть и, мый йӧйталӧмӧй понда
Став сиктыс менӧ дивитас тӧвбыд?!
Мен тайӧ веськодь!
Век жӧ ог нин понды
Йӧз серам улӧ веськавны тарыт
И гажтӧмтчӧмысь ачымӧс ог пальӧд.
Ӧд велалі нин рытйысьны ме тадз.
Кор войыс вевттяс ӧшиньяс сьӧд шалльӧн,
Ме заведита часі, ломта пач.