МЫЖТӦГ МЫЖАЛӦМ
Ми мамкӧд да Веркакӧд локтім гӧститны Марианна ичинь дорӧ. Тайӧ мамлӧн воча чойыс. Сійӧ олӧ Москваын, ыджыдсьыс-ыджыд патераын. Дзик ӧтнасӧн. Не кӧ лыддьыны Григорий каньсӧ: шыр кыявны Марианна ичинь сійӧс босьтӧма.
Ӧти жырйӧ ичиньным овмӧдіс миянӧс. А аслас жырйӧ некодӧс эз тшӧкты пырны! И, дерт жӧ, сӧмын ичиньным муніс удж вылӧ, ми Веркакӧд пыр жӧ котӧртім сылӧн жырйӧ. Сы вӧсна мый оз кӧ позь пырны — сідзкӧ, сэні мыйкӧ эм!
Сэні и збыль вӧлі уна интереснӧйтор. Шкап. Пызан. Гитара. Стенка вылын — страшнӧй пу чужӧм. Сюзь чучела. Сьӧда-еджыда фотография: сэні Марианна ичинь том на, и кутшӧмкӧ уска дядьӧкӧд, а дядьӧ улас гижӧма: «Маруся, радейта!»
Но медся интереснӧйыс — пызан вылын куйлысь стеклӧ кольк. Югыдсьыс-югыд краскаӧн мавтӧма, да синтӧ весиг дойдӧ. Лӧсталысь, гӧрда-лӧза турунвиж кольк! Ми пырысьтӧм-пыр гӧгӧрвоим: Марианна ичинь полӧ буретш сы вӧсна. Сійӧн и жыръяс эз лэдз. Быттьӧкӧ ми ичӧтӧсь на да огӧ гӧгӧрвоӧй, мый позьӧ вӧрӧдны, а мый — оз!
Ми сӧмын недыр сулалыштім да нимкодясьыштім тайӧ колькнас. И кыдзи сійӧ усис пызан вывсьыс да пасьмуніс — ог тӧдӧй. Сё збыль! Но ме аддзи петан туйсӧ, зэв тӧлка да (тадзи став велӧдысьыс шуӧ).
— Верка, котӧртлы кухняас, — тшӧкті ме. — Босьт холодильниксьыс кольк. Сійӧ эськӧ абу стеклӧысь, но мед. Нинӧм дорысь бурджык сійӧ. А ме сэккості краска корсьла. Краситам кольксӧ важыс моз жӧ. Ичиньным оз и тӧдлы!
Верка котӧртіс колькла, а ме куті корсьны краска. Пызан вылын абу. Шкапын абу. Гитараын и. Пу чужӧмыс, буракӧ, нинӧм жӧ оз тӧд краска йывсьыс. Сюзь чучелаыс и. Дай фото вылас уска дядьӧыс оз жӧ тӧд... Став жырсӧ мӧдарӧ путкыльті. Но век жӧ аддзи, ӧд ме зэв сюсь (тадзи став велӧдысьыс шуӧ). Краскаыс куйліс пызан йӧрын. Ыджыд мича кӧрӧб. Мен эськӧ татшӧмсӧ!
Сэсся Верка локтіс. Киас колькйӧн, но жугыль. Муртса оз бӧрд. Сійӧ, вӧлӧм, кольксӧ корсигас холодильниксьыс кутшӧмкӧ пакет пӧрӧдӧма.
Ме юася:
— Кутшӧм пакет?
Сійӧ нюркнитӧ:
— Ту-у-урунӧн... Да сэтшӧм чӧскыдтӧм дука...
Шуа:
— Но и мед! Мыйысь сэн ревгынысӧ? Колькйыд кӧ сюрис и! Вай татчӧ ӧдйӧджык, краситам!
Краскалы васӧ босьті ванна жырйысь.
А киссьӧм туруныс, вӧлӧмкӧ, валерьянка. И Григорий каньлы таысь лои зэв нимкодь. Краситнысӧ на эг заводитӧй, а сійӧ тай кыдзи нявӧстас долыдысла!
Но, мися, думайта, ӧні мамӧй садьмас! Сеті Веркалы кольксӧ да краскасӧ и котӧрті кухняӧ — Григорийӧс лӧньӧдны.
Но ме зэв ёна тэрмаси, и сувтсис веськыда жугалӧм стеклӧ кольк вылас. Тяпиа вӧлі, а доймис! Понді чеччавны коридорӧд. Григорий, буракӧ, кольмӧм юрнас чайтіс менӧ шырӧн. Кыдз тай чеччыштас ме вылӧ кухнясянь, кыдз тай горӧдас! А чеччыштӧма сійӧ, буракӧ, тасьті-пань видзан шкап вывсянь, сы вӧсна мый кылі: «Бдыжжж! Дзынннь! Бдыжжж! Дзынннь! Грым-грам!»
И сэки мамӧй орчча жыръяс садьмис:
— Челядьпиян, тіян ставыс бур?
Ме Григорийӧс ас дорсьым буретш зіля нетшыштны, а воча горза:
— Да, мамук, ставыс бур!
Збыльысь ӧд, нинӧм эз ло! Сӧмын Верка мӧд кольксӧ жугӧдіс да краскасӧ уськӧдіс. Сэсся васӧ кисьтіс. Зык-шумсьыс повзис да. Нывкаыд ӧд нывка и эм.
Но мамӧй эз эскы миянлы. Чеччис да котӧртіс тӧдмавны збыльсӧ. И, дерт жӧ, вильдіс киссьӧм ва вылын да кокнас веськаліс краскаӧ. И кутіс горзыны: «Коді тайӧс вӧчис?!»
Сійӧ здукас стенка вылысь уси повзьӧдчана пу чужӧмыс. И веськыда Григорий вылӧ! Кань чайтіс, мый сійӧс виӧны, и чепӧсйис занавеслань. И, дерт жӧ, жмуткысис джоджас занавесыскӧд тшӧтш. Гыжйыс ён да. Занавесыс и сідз нин ӧдва ӧшаліс. Сійӧн и усис...
Пондім мӧвпавны, мый водзӧ вӧчны. И шуим гусьӧникӧн шыбитны и краскасӧ, и кольк кышсӧ ёг трубаӧ, сэсся идравны пазьнитчӧм тасьтіяссӧ да киссьӧм валерьянкасӧ. Марианна ичиньлӧн удж вывсьыс вотӧдз.
Но, кольк кышсӧ да краскасӧ шыбитім. А валерьянкасӧ чукӧртны эз и ковмы: Григорий пӧшти ставнас сёйӧма. Тасьті-дозмукыс джынйыс жулльысьӧма. Бур кӧть, мӧд джынйыс дзоньӧн кольӧма.
Рыт кежлас ми зэв сӧстӧма ставсӧ идралім. И Марианна ичинь удж вывсьыс воӧм бӧрын дыр миянӧс ошкис. А бӧрыннас висьталіс:
— А ме ӧд тіянлы козинъяс лӧсьӧдлі!
И котӧртіс жыръяс. И дыр эз лок. Сэсся петіс шӧйӧвошӧм чужӧма и шуис:
— Нем ог гӧгӧрво. Матвейлы да Вералы зэв бур краска ньӧби. Тэныд, Тася, «шуд кольк». И кӧні ставыс?
Мамӧй шармӧдіс синъяссӧ и кутіс куньтыравны ӧти синсӧ. Ме чуйми да юалі:
— Мый нӧ, мам, синтӧ лапйӧдлан?
Виччысьтӧг Верка швачкис бокас кисӧ да горӧдіс:
— Ми ӧд козинъяснымӧс ёг трубаас шыбитім!
Но, нывкаыд ӧд нывка и эм.
Марианна ичинь первой гӧрдӧдіс, сэсся кельдӧдіс, а сэсся виччысьтӧг лӧзӧдіс! Но и но! Эг на тӧдлы, мый сійӧ тадзи кужӧ! Шензьӧдан сяма йӧзтӧ ме пыдди пукта! Пыр жӧ и юалі:
— Марианна ичинь, а ті пельтӧ кужанныд легӧдны?
Верка содтіс на:
— А нырӧдзыд кывнад судзанныд? А менӧ велӧданныд?
Сэсся мам вылӧ видзӧдлі да гӧгӧрвои: весьшӧрӧ тайӧс юалім.
Коліс кыдзкӧ аддзыны пикӧ воӧмысь петан туй. Бур на, ме кужа тайӧс вӧчны. Став велӧдысьыс тадзи шуӧ.
Марианна ичиньӧс коліс бурӧдны. Мед сылы нимкодь лоӧ. И ме шуи мунны да краситны уска дядьӧа сьӧда-еджыда фотографиясӧ. Фотографияыс Марианна ичиньлы, буракӧ, зэв дона, пызан вылас кӧ нин пуктӧма!
Краскаыс эз вӧв, но вӧліны уна рӧма фломастеръяс. Менам ӧд ыджыд серпасасян сям. Тадзи велӧдысьяс шуӧны...
Зэв на мичаа и артмис! Дядьӧлӧн ускыс лои лӧз, синмыс — вижовгӧрд, пельыс — турунвиж, пинжакыс — кольквиж, гӧрдовлӧз визьяса. Марианна тьӧтӧс ме шуи ставнас гӧрдӧн вӧчны, мед мичаджык лоас. «Маруся, радейта!» гижӧдсӧ краситі сьӧдӧн, мед эз тыдав: гижӧдыс, пӧлӧса да, фотографиясӧ тшыкӧдӧ.
Сійӧ здукас Верка локтіс кухняысь да пондіс гитараӧн брунгыны. Гитараыс, буракӧ, вӧлӧма дзик важ. И куим вез пырысьтӧм-пыр и орис.
А сідзсӧ ставыс вӧлі бур. Сӧмын ӧнӧдз ог гӧгӧрво: кыдзи сюзь чучелаыс ӧшиньӧдыс усис?
Ӧні ми Веркакӧд мыжаяс моз патераын пукалам, и весиг Москваса зоопаркӧ огӧ ветлӧй. Мыйысь бара-й мыжмим-а?!
