КӦДЗЫД ПӦЛЬ

— А Кӧдзыд пӧльыс абу, — шуис Санька.

— Кыдз нӧ абу? Эм кӧ-а, — паныд сувтіс Никита. — Ме узя-узя, а асывнас ёлка улын козинъяс!

— Тайӧ тэныд бать-мамыд сэтчӧ пуктӧны, — гӧгӧрвоӧдіс Санька.

— Мыйӧн тӧдан? — пузис Никита.

— А тэ мыйӧн тӧдан?

— Но сідзкӧ талун асьным Кӧдзыд пӧльыслысь юалам, збыльнӧй абу сійӧ. Школаса гаж вылас локтас да, — вӧзйис Санька.

— Ладнӧ, — ӧтикывъясис Никита. — Юавнысӧ весиг оз ков. Тошкӧдыс тракнитан — и торъялас. И тэ аддзан, мый тайӧ абу Кӧдзыд пӧль!

— А код нӧ, сідзкӧ?

— Но, ог тӧд... — ӧвтоввӧчис кинас Никита. — Гашкӧ, театрысь артист. Гашкӧ, кодлӧнкӧ батьыс. А вермас лоны, и Виктор Фёдорович.

— Кутшӧм сэтшӧм Виктор Фёдорович? — чуймис Никита.

— Но, физкультураысь велӧдысь.

— А сійӧ мӧй Виктор Фёдорович? — нӧшта на ёна шемӧсмис Никита. — Сійӧ жӧ Аркадий Сергеевич.

— Абу мӧй веськодь? — пузис Санька. — Сійӧ ӧд сёровно абу збыльнӧй!

И со школаын пансис гаж. Челядь локтісны вӧччӧмаӧсь да гажаӧсь. Спортзал шӧрын — югъялысь пӧнарикъяса коз. Гирляндаяс, шарикъяс, хлопушкаяс. Урокъяс водза-водз помасисны. Ставныс шудаӧсь. Весиг директор.

Гажсӧ нуӧдысьыс, ичӧт классъясса завуч Маргарита Витальевна, шуӧ:

— Ӧти-кык-куим. Ӧти-кык-куим.

Сійӧ тадзи микрофонсӧ прӧверитӧ.

Прӧверитіс — и водзӧ сёрнитӧ:

— Видза оланныд, челядь!

Талун Выль вося гаж вылӧ

Кӧдзыд пӧльныд локтіс ылысь.

Вайӧ ӧтвыв гажа горӧн

Кӧдзыд пӧльӧс татчӧ корам!

И челядь кутісны корны Кӧдзыд пӧльӧс. Корӧны, мый вынсьыс горзӧны. Сійӧ ӧд долыд дай банйӧм, а сьӧрсьыс козинъяс эмӧсь. Медся ёна горзӧны Санька да Никита. Санькалы окота эскӧдны, мый Кӧдзыд пӧльыс эм, а Никиталы — мӧдарӧ, мый сійӧ абу...

Пырис Кӧдзыд пӧль — кузь еджыд тошка, мешӧка да беддя, и шуӧ кызсьыс-кыз гӧлӧсӧн:

— Чолӧм, нывкаяс да зонкаяс! Ставныдлы чолӧм! А ме — Кӧдзыд пӧль! Но, кыдзи таво олінныд? Бать-мамныдлысь кывзысинныд? Кыдзи велӧдчинныд? Уна-ӧ «кык» босьтінныд?

Сералӧны челядь. И Санька сералӧ:

— Аддзан, — шуӧ Никиталы, — Кӧдзыд пӧльыс збыльнӧй! Гажа, вильыш, дзик быттьӧ том!

— Абу збыльнӧй! — кильксӧ Никита. — Сійӧ том и эм. Абу Кӧдзыд пӧль да.

Пондіс збыльнӧй-абу збыльнӧй Кӧдзыд пӧльыс первой класса велӧдчысьяскӧд коз пу гӧгӧр кытшлавны, сьывны да ворсны.

— А нӧшта, Кӧдзыд пӧль, — ошйысьӧ Маргарита Витальевна, — миян челядь уна кывбур тӧдӧны.

— Кывбуръястӧ ме радейта! — нимкодь лои «Пӧльлы-абу Пӧльлы».

— Со пукышт и кывзышт, — вӧзйӧ сылы завуч. И челядь дорӧ шыасьӧ: — Код нӧ тіян пиысь медся повтӧмыс? Коді медводдзаӧн Кӧдзыд пӧльлы кывбурсӧ лыддяс?

— Ме, ме лыддя! — горзӧ Никита.

— Но лок, Никитушка... — корӧ Маргарита Витальевна. — Сӧмын сувт Кӧдзыд пӧль дорас матӧджык. Сійӧ кӧть и унатор кужӧ, но пӧрысь да лёка кылӧ...

— Нинӧм он вӧч, — ышловзьӧ «Пӧль-абу Пӧль». — Пӧрысьладор дзикӧдз пельтӧмми. Кӧть пель дінын пищальысь шковгы...

— Но, Санька, ӧні аддзылан, мый сійӧ абу збыльнӧй... — нимкодьпырысь шӧпкӧ Санькалы Никита да тэрыба шавксьӧдӧ «Пӧль-абу Пӧль» дорӧ.

«Пӧль-абу Пӧль» копыртчис, мед Никиталысь кывбуръяссӧ бурджыка кывны, гӧрд кепыся кисӧ пель дорас пуктіс... А Никита матыстчис — да кы-ы-ыдз тай тракнитас мый вынсьыс кузь еджыд тошкӧдыс!

А тошкыс тай кыдз оз ор!!!

А завучыс кыдз тай горӧдас Никита вылӧ!!!

Кыдзи вӧтлас гаж вывсьыс!!!

Мунӧны Санька да Никита гортаныс... Никита жугыль, Санька долыд.

— Но мый, аддзан, ме ӧд тэн шулі, — радлӧ Санька. — Кӧдзыд пӧльыс — эм!

Чӧв олӧ Никита, юрсӧ ӧшӧдіс...

Юксис Санька Никитакӧд Кӧдзыд пӧльлӧн козинӧн — кампет-преникӧн, печенньӧӧн да мандаринъясӧн — гажмис Никита.

А Кӧдзыд пӧль локтіс гортас да шуӧ Лымнывлы:

— Ӧдтӧ кутшӧм челядьыс лоины: тошкӧд нетшкӧны, тӧдны кӧсйӧны, збыльнӧй ме абу! Клейыс кӧ эз вӧв ён, — ог и тӧд, коді меӧ сэки эськӧ эскис!