КООПЕРАТИВЪЯС ВОТТӦ ЭТШАДЖЫК МЫНТӦНЫ

Кодлӧн чинӧ вотыд.

Крестьяна, кодъяс ӧтувтчӧмаӧсь му уджавны, восьтӧмаӧсь кооперативнӧй тӧварищество, мынтӧны воттӧ этшаджык. Налы чинтӧны став вотсьыс дасӧд юкӧнсӧ.

Нёльӧд юкӧнсӧ вотсьыс чинтӧны сэтшӧм крестьяналы, кодъяс овмӧснысӧ ӧтлаалӧмаӧсь: ӧтвылысь мусӧ уджалӧны, ӧтласа скӧтныс, став му уджалан кӧлуйныс (коммунаяс, артельяс, тӧвариществояс).

Оз чин вотыд, оз кӧ татшӧм ӧтувтчӧм крестьянаыс куш ас выннас уджавны, медалӧны кӧ йӧзӧс бокысь.

Чинӧ вотыд му уджалӧм бурмӧдӧмысь, выль ногӧн уджавны заводитӧмысь. Сӧмын оз быдӧнлы чинтыны. Ӧткӧн кӧ уджалӧны, оз чин вотыд, а ӧтвылысь кӧ босьтчӧны сійӧ уджсӧ нуӧдны — чинӧ. Чинӧ — сельскӧй обществояслы, земельнӧй общество да тӧвариществояслы, вый вӧчысь тӧвариществояслы, крестьяналысь вузӧссӧ иналысь кооперативъяслы.

Сэсся колӧ ещӧ висьтавны: оз чинтыны воттӧ бура му уджалӧмъясысь сэки, кор став вӧлӧсьтыс сідз жӧ выль ногӧн, бура уджалӧ. Чинтӧны ӧд водзмӧстчӧмсьыс, мукӧд крестьяналы пример петкӧдлӧмсьыс. Шуам, чинӧ вот уна пельӧ му юкӧмӧн уджалӧмысь. Став вӧлӧсьтыс кӧ нин уна пельӧ юкӧма — сэки оз нин чин.

Коді чинтӧ вотсӧ?

Гижӧд вот чинтӧм йылысь бура му уджалӧм понда, коллективнӧй да кооперативнӧй кӧзяйствояс сетӧны уезднӧй земельнӧй отделӧ, оз Исполкомӧ.

Гижӧд дінас ещӧ на колӧ: 1) пасйӧд, збыль-ӧ выль ногӧн мусӧ уджалӧ гижӧд сетысьыс; 2) мый шуӧ сійӧ кӧзяйство йывсьыс агроном; 3) подворнӧй список став кӧзяйствоыслӧн, кодъяс пырӧмаӧсь кооперативас ли коллективас. Бӧръя гижӧдыс вӧчсьӧ поселеннӧй список моз, мед позьӧ вӧлі тӧдны, уна-ӧ муыс, скӧтыс, кӧдзаыс да мукӧдтор татшӧм кӧзяйствоыслӧн. Списоксӧ колӧ кырымӧдны Волисполкомын ли мед финансӧвӧй инспектор кырымалас.

Кыдзи чинтыны вотсӧ.

Уезднӧй Земотдел, тӧлысся срокӧ гижӧд сетӧм бӧрти, индалӧ, кодлы колӧ вот чинтыны, юӧртӧ аслас шуӧм йылысь уезднӧй налогӧвӧй комиссияӧс. Сійӧ ыстӧ уезднӧй Финотделӧ, а сэтісянь воӧ Волисполкомӧ.

Р. С.