МУСИН БУРМӦДЫСЬ ТӦВАРИЩЕСТВО

Мед муыд бура нянь ваяс, сылы колӧ тырмӧмӧдз куйӧд. Куйӧд лоӧ тырмӧмӧдз, эм кӧ скӧт. Скӧтлы колӧ сёян. Миян омӧля на кӧдзӧны турунъястӧ да скӧт вердан пуктастӧ. Сы понда вердӧны скӧттӧ куш сэтшӧм турунӧн, кутшӧм быдмӧ видзьяс вылын.

Мыйта колӧ сэтшӧм туруныс скӧтлы миян обласьтын, мед эськӧ му миян оз омӧльтчы ӧнія дорысь, ӧнія моз, куим пельӧ юкӧмӧн уджалігӧн?

Ӧти десятина му вылӧ колӧ кык десятина видз, либӧ кык десятина му вылӧ куим десятина видз — сійӧ медэтша нин. Дерт эськӧ, эз кӧ куим кӧдза миян вӧв, виддзыд ковмис этшаджык.

Миян ӧні виддзыд оз тырмы. Мед вӧлі тырмӧмӧдз, позьӧ вӧчны выль видзьяс. Миян эм уна шыбитӧм муяс, васӧдінъяс, нюръяс. Сэтшӧминъяссӧ позьӧ косьтыны, пуяссӧ сэсь позьӧ перъявны дай вӧчны видзтӧ. Сэтшӧм удж дорад ӧти морт босьтчыны оз вермы. Вермасны босьтчыны сійӧ уджӧ сӧмын ӧтувтчӧмӧн дзонь грездъяс ли вӧлӧсьтъяс.

Унджыкысьсӧ сэтшӧм мунас пӧльзуйтчӧны став крестьянаыс.

Вермас лоны сідзи: кор крестьяна шуасны босьтчыны сійӧ муястӧ бурмӧдны, сюрӧны пыксьысьяс уджсьыд — ӧд рӧскод и быдтор лоӧ. Сы понда, мед эз вӧв бӧрӧнитчӧмъяс, зыкъяс, мед позис удждыны дыр кежлӧ государстволысь сьӧм, колӧ восьтыны мусин бурмӧдысь тӧварищество (мелиоративное товарищество).

Унджык крестьянаыс кӧ шуасны сэтшӧм тӧвариществосӧ восьтыны, ставыслы лоӧ пырны сэтчӧ, тшӧтш уджавны дай рӧскодсӧ тшӧтш нуны.

Тӧвариществолысь косьтӧм да вӧчӧм муястӧ оз юкны ни, оз босьтны ни, бура кӧ пондас сійӧ водзӧ мутӧ уджавны.

Кор тӧварищество кӧсйӧ босьтчыны му бурмӧдны вӧрысь, колӧ войдӧр мутӧ корны Земотделысь.

Коми йӧз, энӧ сетӧй муясыдлы омӧльтчыны!

Тіянлы колӧ куйӧд, колӧ скӧт, колӧны видзьяс.

Видзӧдлӧй ас гӧгӧрныд — мыйта гӧгӧр шыбитӧмӧн шыбитӧма куйлӧ му. Энӧ жалитӧй уджнытӧ, энӧ жалитӧй сьӧмнытӧ. Сёысь унджык воас тіянлы бур турун, лоас тіян бур скӧт, муясыд уна нянь пондасны вайны. Верманныд и мынтысьны, сьӧм кӧ удждыланныд.

Заводитчӧй бурмӧдны омӧль эновтӧм муяс!

Отсӧг тіянлы лоӧ — шыӧдчӧй Земотделӧ.

Н. Соколов.