КӦДЗӦЙ БУР КӦЙДЫСӦН

Тӧдӧны крестьяна: дзоньвидзаӧсь кӧ бать-мамыс, челядьыд дзоньвидзаӧсь чужӧны. Сы понда гӧтрасигад корсьӧны бабатӧ дзоньвидза, ён семьяысь.

Медбӧрын тайӧ тӧдӧмсӧ крестьяна петкӧдісны му вылӧ.

Мый ми кӧдзам.

Кӧйдыс йывсьыд ми омӧля тӧждысям. Кӧдзам ми му вылад омӧлик, кокньыдик, ёгӧсь кӧйдыс. Медбур весасян машинаыс миян — тӧв да зыр. Мукӧддырйи натӧг на ещӧ овлам.

Крестьянаыд оз на тӧдны, мыйта бурсӧ сетӧ бур кӧйдыс. Кывлывлам на сёрнияс: «Юрбитӧмӧн кӧть лыа кӧдз — няня лоан». Либӧ: «Кӧдзи юрбитӧмӧн турун, енмыс сетіс шобді».

Ӧні татшӧм му уджалӧмыд ылӧ нин бӧрӧ кольӧма. Тадзи сёрнитӧны сӧмын медпемыд крестьянаыс.

Кӧдзам ми, збыль, омӧль кӧйдысӧн. Мукӧд четвертяд миян муртса 8½−9 пуд. Сэсся быд пуд вылӧ пунт 4 кымын ёг.

Сюсьджык йӧзыс кыдз вӧчӧны.

Сюсьджык йӧзыд со мый казявлӧмаӧсь: кӧдзлӧмаӧсь сьӧкыд сю — 10½ пуд четвертьын — воӧма 132 пуд, 9½ пудъя четверть сю сетӧма 86½ пуд, а кокньыд сю — 8½ п. четвертьын — сетӧма сӧмын 42 п. 30 пунт. Сьӧкыд зӧрйысь воӧма 132 пуд, а кокньыдысь, омӧликысь — 80 пуд. Сьӧкыд шобдіысь — четвертяс вӧлӧма 10½ п. — воӧма 142 пуд, 8½ пудъя четвертьысь воӧма сӧмын 40 пуд.

Тадзитӧ видзӧдлӧмаӧсь дай казялӧмаӧсь — кутшӧм пӧ кӧйдысыд, сэтшӧмӧс и няньтӧ босьтан.

Воӧ кӧдзан кад.

Гожӧмыд он и аддзыв кольӧ. Локтас кӧдзан кад. Заводитчӧй лӧсьӧдны-бӧрйыны сю кӧйдыстӧ. Кӧні эмӧсь, колӧ машинаясӧн сійӧ уджтӧ вӧчны — ӧткымынлаын ӧд миян вӧлӧсьтъясын машинаясыс эмӧсь. Кӧні абуӧсь — колӧ машинаястӧг кыдзкӧ сійӧ жӧ вӧчны. Агрономъяс, мукӧд пӧлӧс велӧдчӧм войтыр, велӧдӧй крестьянаӧс кӧйдыс бӧрйыны. Висьтавлӧй та йылысь крестьяналы, гижӧй газетӧ.

Кӧйдыстӧ бӧрйылысь.