КОРСЯМӦЙ ВЫЛЬ ТУЙ!
Нэмным ми лыддьысям му уджалысьясӧн, миян Россия шусьӧ «земледельческӧйӧн». Сӧмын тай олӧмыс кыдзкӧ-мыйкӧ абу зэв кокньыд — пыр лоӧ ныр вылӧ усьтӧдз тільсьыны, кынӧмпӧт перйыны. Став олӧм миян сьӧкыд удж.
Мукӧд государствояслӧн зэв ёна гажныс бырӧма роч няньысь, виччысьӧны миянсянь нянь. Ми эськӧ нимкодьпырысь найӧс гажӧдыштім асланым няньӧн да, асьным омӧлика судзсям.
Кодсюрӧ мӧвпалӧны тадзи: став мунымӧс кӧ кутам уджавны, мыйта вӧлі войнаӧдз, гӧгӧр лоас зэв бур, лӧсьыд, овны сэки лоӧ кокньыд.
Дерт, позьӧ шуны, и тайӧ абу зэв омӧль. Сӧмын колӧ сэтчӧ со мый шуны: мыйла нӧ эськӧ ми вермасим та дырасӧ озыръяскӧд, мыйла вӧчим революциясӧ, сӧвет власьтсӧ мыйла лӧсьӧдім? Бурджыка кӧ та йылысь мӧвпыштам, аддзам да збыльысь и шуам: пӧдлинӧ ӧд, важ ногыд кӧ бара му уджавны кутчысьны, гӧлиника овны — эз и ков нинӧм вӧчлыны, мед нэмным важ моз и коли...
Ӧнӧдз ми вермылам чукӧртны няньтӧ уна-уна вылӧ нин 35−40 пуд десятинаысь. Со ӧд кутшӧм миян уджалӧмыд! Артыштан кӧ, мыйта сэтчӧ лоӧ уджсӧ пуктыны, пӧсьсӧ кисьтны, дзоньвидзалунсӧ воштыны!.. Зэв этша пӧльза воӧ миян му уджалӧмысь ӧні. Шуам, 40 пудсьыд воас, чӧлкӧвӧйӧн кӧ лыддьыны, нелямын шайт десятинаысь. Кымын вӧла-морта лун сэтчӧ вошӧ? Нинӧм вылӧ оз вешты уджсӧ. Уджалам дзик прӧста медтыкӧ тшыгла ог кулӧ-а. Медым вермас кытсюрӧ дӧмлыны овмӧссӧ, крестьяниныдлы нянь чукӧртӧм бӧрас няньсӧ лоас вузавны, тырмас кӧть оз, а тулысланьыс бӧр лоӧ нянь корсьны. Тадзи и мунӧ миян олӧмным.
Видзӧдламӧ вайӧ мукӧд государствоясысь нянь воӧмсӧ бӧръя дас вонас.
| Ид | Зӧр | Сю | Шобді | |
| Англияын | 127 п. | 118 п. | — | 149 п. десятина. |
| Германияын | 127 „ | 122 „ | 109 | 130 „ — „ — |
| Голландияын | 176 „ | 145 „ | 111 | 153 „ — „ — |
| Бельгияын | 179 „ | 161 „ | 145 | 157 „ — „ — |
Та серти аддзам, кутшӧма вермӧ нянь воны мукӧд государствоясын. Гашкӧ, шуанныд, миян муным омӧльджык найӧ дорысь? Ньӧти оз позь тадзи думайтны. Миян Россияын муыс абу омӧль мукӧдлаын дорысь, сӧмын огӧ кужӧ бурасӧ вӧдитчыны, огӧ кутчысьӧ мунымӧс уджавны наука серти.
Ӧні видзӧдлам, кыдзи ми лишнӧй няньнас (вӧвлі кӧ лишнӧйыс) вӧдитчывлім. Быд во Россия вӧлі вузалӧ заграничаӧ 750 миллион пуд нянь 700 миллион шайт дон. Миянлысь няньнымӧс заграничаын унджыксӧ вӧлі скӧтлы вердӧны, весиг миян сакарӧн англичана вӧлі порсьяснысӧ тшӧгӧдӧны. Абу и дивӧ. Быд куим пуд нянь, вердан кӧ мӧслы турун сорӧн, сетӧ йӧв дас пудйӧн унджык. Тадзинад ми заграничалы сетам няньнаным кык миллиард да джын пуд йӧв, лыддьыны кӧ чӧлкӧвӧйӧн пуд, ми быд во воштам кык миллиард шайт дорысь унджык.
Со ӧд кутшӧма миянӧс шырлісны, раминик ыжъясӧс моз.
Мый нӧ вӧчны колӧ? Кыдзи петны татшӧм кытшсьыс?
Колӧ корсьны выль туй, колӧ муӧ кутчысьны выль ногӧн, колӧ ӧнія сьӧкыд уджсӧ вежны, кокньӧдны.
Вермам-ӧ, судзсяс-ӧ миян тӧдӧмным? Вермам, судзсяс. Кӧть гӧлиникӧсь на ми, унатор на абу, ёна на быдлаті колӧ дӧмлыны, сӧмын сыысь нинӧмла повны. Миян эмӧсь агрономъяс, найӧ велӧдасны, кыдзи колӧ выль ногӧн видз-му уджавны, наука серти. Колӧ сӧмын тайӧ наукасӧ разӧдны деревняясӧ.
Разӧдны вермам ми ӧні ӧти ногӧн — газетӧн, гижӧдӧн, дерт, быд деревняӧ оз судзсьы агрономыд (коркӧ эськӧ лоӧ быдлаын да). Ӧні колӧ велӧдчыны гижӧдысь, лыддьӧмӧн. Сы серти сэсся и видз-мутӧ уджавны босьтчыны.
Коми крестьяна миян вывті на пемыдӧсь, оз лыддьыны газетъяс, оз уджавны наука серти, агрономъяс висьталӧм серти.
Миян «Югыд туй» газетын кутасны гижавны статьяяс агрономъяс, велӧдчыны позьӧ.
Судзӧдалӧй, лыддьӧй газет!
