БУРМӦДӦ МУСИН

Быд воӧ миян Сӧвет Республика Союз пасьта ӧтилаын да мӧдлаын косьмӧны кӧдзаяс. Мукӧд воясас нянь оз волы уна губерня пасьта (тадзи вӧлі 1921 воын Волга юдорса губерняясын), йӧзыс тшыгъялӧм понда разӧдчывлісны Роч му пасьта. Велӧдчӧм йӧз ёна тайӧ воясас кутісны тӧдмавны, мый понда тшыкӧны кос поводдя дырйи кӧдзаяс. Ӧні бура нин тӧдмалӧмаӧсь, шуӧны: уна пӧ эм мусин (почва) бурмӧдӧм (мелиорация) сайын. Сӧвет власьт, велӧдчӧм йӧз висьталӧм серти, чорыда кутчысис тайӧ уджӧ. Обласьтса (губерняса) исполкомъяслы тшӧктӧ лӧсьӧдавны крестьяна костын ӧтвылысь нуӧдан нюръяс косьтан, видз-му бурмӧдан уджъяс, мед водзӧ крестьяналӧн овмӧс ӧдйӧджык бурмас. Лӧсьӧдӧма нин Мӧскуаын мусин бурмӧдан комиссия. Тайӧ комиссия пыр сӧвет власьт отсалӧ исполкомъяслы деньгаӧн. Ӧтвылысь мусин бурмӧдан уджъяс колӧ лӧсьӧдавны водзвыв лӧсьӧдӧм план серти уна во кежлӧ. Гӧльджык йӧзлы колӧ ӧтувтчавны тӧвариществоясӧ, мед найӧ сӧвъявмасны бура видз-му уджалӧмӧн. Тайӧ уджӧ тшӧктӧны кутчысьны тавосянь. Татшӧм уджъяслы колӧ отсавны быд учрежденньӧяслы, кооперативъяслы, мӧда-мӧдлы отсасян комитетъяслы.