БӦРЙӦЙ БУР СӦВЕТЪЯС

Регыд миян обласьт кузя пондасны крестьяна бӧрйыны выль сӧветъяс. Заводитчасны съездъяс — войдӧр вӧлӧсьтъясын, сэсся каръясын.

Обласьтысь муналӧны нин йӧз съездъяс вылас. Колӧ и вӧлӧсьтъясын крестьяналы неуна лӧсьӧдчыштны, арталыштны, кыдз-мый налы бурджыкӧс аслыныс юралысьяссӧ бӧрйыны. Быд во уджалысь йӧз миян Республикаын улісяньыс выліӧдзыс, грездъяссянь гырысь каръясӧдз, видлалӧны ассьыныс сӧветъяссӧ. Бӧръялӧны сэтчӧ выль уджалысьясӧс, сюйӧны выль том вынъяс, вӧтлӧны шогмытӧм йӧзӧс.

Веськавлӧны на ӧнӧдз омӧль йӧзыд сӧветъясад — кыдзкӧ ӧд найӧ быдлаӧ сюйсьыныд кужӧны. Сэтшӧм омӧль йӧзыд деревняын — озырджык йӧз. Сӧвет власьттӧ пыдди найӧ оз пуктыны. Уджалӧны сідз, мед эськӧ кыдзкӧ-мыйӧнкӧ сӧвет власьттӧ крестьяна водзын лякны. Мукӧддырйи бур декреттӧ сідз бергӧдасны — сӧвет власьтыд ассьыс декретсӧ оз тӧд, висьталан кӧ, сідз пӧ вӧчӧны.

Дерт, уджалысь йӧзлӧн правительствоыд став уджсӧ нуӧдӧ сідз, мед эськӧ отсавны гӧльджык, судзсьытӧмджык крестьяналы, кокньӧдны налысь олӧмсӧ, бергӧдны найӧс бур выль олӧмӧ.

Озыръясыдлы сійӧ оз во сьӧлӧм выланыс. Найӧ кыскӧны пыр на асланьыс. Сы понда найӧ сюйсьӧны быдлаӧ, сы понда гудралӧны йӧзсӧ, сы понда омӧля уджалӧны.

Ӧні со, шуам, таво кежлӧ деревняын кутшӧм уджъяс эмӧсь?

Кыпӧдны кооперация, ӧтувтны крестьянаӧс крестьянскӧй комитетъяс бердӧ, отсавны крестьяналы ёнмӧдны овмӧснысӧ, вуджны выль ногӧн муяс-видзьяс уджавны. Сэсся колӧ бура нуӧдны вот перъян удж, мед эськӧ крестьяналы эз вӧв зэв сьӧкыд дай мед государстволы доход воис.

Колӧ ещӧ миян коми крестьяна пытшкын ёна паськӧдны йӧзӧс югдӧдан удж. Тайӧ став уджъясыс гӧль да шӧркоддьӧм крестьяналы бур вайӧны, налы пӧльза вылӧ вӧчсьӧны.

Бура позяс вӧчны тайӧ став уджсӧ, кор асьныс гӧль крестьянаыс босьтчасны уджавныс, кор ас костсьыс бӧръясны вежӧра, тӧлка йӧзӧс, гӧль йӧз дорыс сулалысьясӧс. Коми крестьяна, лӧсьӧдчӧй сӧветъястӧ бӧрйыны!