КАЗЬТЫЛІГӦН...
Паныдасисны кык видзӧдлас. Кык тӧдтӧм морт. И сійӧ здукас быттьӧкӧ ыпнитліс чардби. Код тӧдас? Мыйыс оз овлы олӧмас?
Гожӧм шӧр. Дженьыд войяс да юмов асъя кыаяс... Здук сайын ме сійӧс эг на тӧд. Сӧмын ӧні, синъяс вочаасигӧн, мыйкӧ лоис. И гӧгӧр ставыс вежсис. Орччӧн сулалысь йӧзыс лоисны кутшӧмкӧ мӧд пӧлӧсӧн.
Ӧти видзӧдлас — и ме быттьӧ тӧда сійӧс зэв важысянь. Син лэдзлытӧг видзӧда сы вылӧ: сералӧ-нюмъялӧ, мыйкӧ висьталӧ. И мый сыын сэтшӧм аслыспӧлӧсыс? Висьтавны весиг он куж. Видзӧдлыны кӧ, — мукӧд кодьыс жӧ. И торъя мичанас он шу. Но пытшкӧсам мыйкӧ торйӧдіс сійӧс мукӧдсьыс.
Водзӧ видзӧда сы бӧрся. Сійӧ видзӧдліс ме вылӧ! Кыя видзӧдлассӧ! Ме пыр быттьӧ би муніс. Векжӧ ог вешты синъясӧс. Сійӧ тшӧтш кутіс ворсӧдчыны синъяснас.
Мый лоан ло, сӧмын колӧ тӧдмасьны сыкӧд, кывлыны гӧлӧссӧ да гӧгӧрвоны: кутшӧм би ӧзйис пытшкӧсам? Тайӧ здукъясас ме дугді кывны ёртъяслысь сёрнисӧ, дугді аддзыны ас гӧгӧрысь. Ме водзын колис сӧмын тайӧ мортыс. Быттьӧ ми кыкӧн тайӧ му вылас. Сійӧ важӧн нин казяліс: ме видзӧда сӧмын сы вылӧ. И веськодь, мый тайӧ здукас сійӧ мӧвпалӧ ме йылысь. Эк, талун аддзӧ менӧ, а аски... Мун, корсь менӧ.
Буракӧ, тадзисӧ Енмыс шуӧма: тайӧ том мортыскӧд ме тӧдмаси. И кадыс сувтіс...
— Некор тадзисӧ йӧз вылас эн видзӧд, — паніс сійӧ сёрнисӧ.
— Мыйла?
— Пыран веськыда сьӧлӧмӧ да жугӧдан сійӧс...
— Эн ылӧдчы, сьӧлӧмъястӧ ме жуглыны ог куж.
— Менсьым тай жугӧдін-а, — кыпӧдіс ме вылӧ нимкодь синъяссӧ.
— Тайӧ сӧмын тэнсьыд. Татшӧмыс сэсся оз нин ло.
— Ставыс лоас. Ставыс водзын. Кывъяснад эн шыблась.
— А ме ог и радейт наӧн шыбласьны.
— А мый нӧ радейтан?
— Радейта шӧйтны войся карӧд уличаяс кушмӧм бӧрын. Сэки ставныс узьӧны, сӧмын кӧнсюрӧ ӧзйӧны биторъяс да кылӧ пуяслӧн вашкӧм. Радейта, кор лунся помасьлытӧм зык-шумыс вежсьӧ лӧсьыд чӧв-лӧньӧн, а сійӧс мичмӧдӧма лэбачьяслӧн сьылӧм-дзользьӧмӧн. Тайӧ здукас меын чужӧ ӧти кӧсйӧм — лэбавны...
— Тэ висьталан мойд сяма кад йылысь. Он пыксьы, кыкӧн кӧ мунам лэбавны? — кылі сысянь тайӧ долыдмӧдана кывъяссӧ.
Ми кутчысим да мӧдӧдчим. Ме и ӧні на казьтывла: асылӧдзыс шӧйтім кушмӧм карӧд да сёрнитім, варовитім. Быдтор йывсьыс: олӧм йылысь, кольӧмаыс да локтанаыс йылысь. Та бӧрын ми нӧшта на ӧтчыдысь паныдасьлім. Тӧда, ми некор ог лоӧй ӧтлаын. Быдӧнлӧн аслас олӧм. Но сыкӧд аддзысьлӧмъяс бӧрын колисны зэв югыд казьтылӧмъяс, водзӧ лоанаӧ эскӧм. Сійӧ вӧлі меным Югыдӧн. И эз вӧв муслунлӧн ни ӧти чир. Но и мед. Козьналӧм югыдыс и ӧні югзьӧдӧ олӧмӧс, шонтӧ сьӧлӧмӧс.
