МУСЛУНЛӦН ЮГЫД

Автобус ӧдзӧсъяс воссьӧм бӧрын йӧзыс пырысьтӧм-пыр тэрмасьӧмӧн сӧлісны сэтчӧ, пуксялісны. Бӧръяӧн пырис том ныв, и автобусын быттьӧ петкӧдчис шонді. А сы гӧгӧр ставыс югзис: тайӧ югыдыс дзик пыр пальӧдіс вугралысь, мый йылысь кӧ век мӧвпалысь пассажиръясӧс. Енэж рӧма югыд синъясыс дзирдалісны нимкодь нюмӧн. Ныв кутіс киас розаяса букет. Сійӧ муніс йӧзтӧминӧ, видзчысьӧмӧн лӧсьӧдыштіс мичасьыс-мича букетсӧ, матыстыштіс морӧс бердас, мед эз нямрась. Бара видзӧдліс дзоридзьяс вылас, нюммуніс: буракӧ, тӧд вылас усис найӧс козьналысьыс.

Став пассажирыс видзӧдісны нывлань, но сійӧ вӧлі насянь ылын.

— Пуксьӧй, — чеччис сы весьтысь том морт, коді синсӧ лэдзлытӧг видзӧдіс ныв вылӧ.

— Аттьӧ, — гусьӧн вашнитіс ныв.

Сылӧн мичлуныс петіс кысянькӧ пытшкӧссяньыс, ловсьыс. Нюмсера синъясыс видзӧдлісны ӧшиньӧ, ывлаас кӧдзыдыс котӧртӧдіс сідзи нин тэрмасьысь йӧзӧс. Нывлы сэтшӧма лӧсяліс тайӧ бур ловруыс! Долыд, шуда! Весиг пассажиръясӧ быттьӧкӧ инмис тайӧ шоныдыс, а дзоридзьясыс тшапа югзисны нывлӧн киясын. Триньӧбтіс телефон.

— Ме кывза, — лӧнь мелі гӧлӧсӧн шуис ныв. — Ме тэнӧ радейта жӧ. Виччыся. Аддзысьлытӧдз.

Автобусын мунысьяс нюммунісны, налы ставыс лои гӧгӧрвоана: сылӧн чужӧм сертиыс тыдаліс ён сьӧлӧмкылӧм, помтӧм шуд, кодлӧн торъясыс, видзӧдӧмпырысь, инмӧдчылісны быдӧн дорӧ.

Ныв нӧшта ёнджыка топӧдіс букетсӧ морӧс бердас. И дзоридзьясыс быттьӧ кылісны муслунлысь шоныдсӧ да мӧдісны дзирдавны асланыс мича рӧмнас. Автобус ставнас ойдіс долыдлун вайысь югыдӧн — муслунлӧн югыдӧн.