ШУД ЙЫЛЫСЬ

Шуд... Быд морт олӧм чӧжыс виччысьӧ сійӧс, суӧдӧ, кыйӧ либӧ воштӧ... Кодлӧнкӧ шудыс век сьӧрсьыс, кодкӧ весиг оз тӧд, мый сійӧ сэтшӧмыс. Быдӧн лыддьӧ шуднас сійӧ, мый медъёна вӧрзьӧдӧ сьӧлӧмсӧ, кыпӧдӧ ловсӧ, сетӧ вынъяс овны. Кодлыкӧ шудыс — тайӧ енэжын шонтысь шонді, а кодлыкӧ — сьӧм. Синтӧмлы медыджыд шудыс — аддзыны, пельтӧмлы — кывны. Дерт, босьтны кӧ озыр мортӧс, сылӧн шуднас лоӧны сьӧм, машинаяс, патераяс, шоныд муясын коллялӧм шойччан лунъяс, быдлунъя выль тӧдмасьӧмъяс, йитӧдъяс... Тайӧ бурторъяс кындзиыс найӧ эз тӧдлыны мӧдсяма шудсӧ. И пыр вӧтчӧны сы бӧрся, дасьӧсь талявны, кок уланыс кӧ кодкӧ веськалас. Татшӧмъясыд мунасны и юръяс вомӧн, мед сӧмын ставсьыныс водзынджык да вылынджык лоны, шпыннявны некодлы ковтӧм весь нюмӧн.

Бомжлы шудыс — кытысь талун судзӧдны сёянсӧ, кӧні войковтны. А босьтны кӧ висьысь, бурдӧдны позьтӧм ичӧт челядьӧс... Налы медся ыджыд шудыс — кор позьӧ быдлаын котравны, ворсны да дурны, быдӧнкӧд сёрнитны, нюмъявны. Челядь век кӧсйӧны лоны ставныс кодьӧн — дзоньвидзаӧн. И та дорын зарниыс, гӧраясыс, енэжысь кодзувъясыс нинӧм оз сулавны!

Олӧм чӧж ми корсям шудсӧ. Тэрмасям, котӧртам. Кытчӧ? Мыйла? Тэнад кӧ эм керка, кӧні пыр виччысьӧны матысса да радейтана йӧз, эм радейтана удж, бур ёртъяс, — таысь колӧ аттьӧавны Енсӧ. Сійӧ сетіс збыль шудсӧ. Сӧмын видз сійӧс. И сэкжӧ эн вунӧд: шудыдлы уна оз ков... Ло олӧмас бур мортӧн, и ставыс лоӧ лючки.