МУСЛУН БӦРДӦ

Тэ тӧдан он, кыдз бӧрдӧ югыд муслун,
Кор сьӧлӧмъясыс кусӧдӧны би?!
Сэк скӧра киссьысь зэрысь ставыс чусмӧ,
А лэбачьясыс пышйӧны дзик пыр.

Ме тӧдлі, кыдзи бӧрдӧ югыд муслун,
Кор эновтӧмӧн кольӧ муса морт,
Кор муслун ёрӧны, сэк пытшкад важыс кусӧ,
А ловлысь долыдлунсӧ вевттьӧ пемыд шог.

Ме кывлі, кыдзи бӧрдӧ югыд муслун,
Кор олӧмыскӧд пансьӧ ыджыд вен.
Кор еджыд лымйыс надзӧникӧн усьӧ
Да шытӧг пуксьӧ киад, быттьӧ гӧн.

Ме аддзылі, кыдз бӧрдӧ югыд муслун,
Кор ворсысь киӧ сюрӧ сӧстӧм лов.
Кор бӧръя курыд кывйыс шога шусяс,
Но сійӧ сылас, сійӧ оз нин ков.