МИТИНГ

Кольӧм вӧскресенньӧӧ, август 3-ӧд лунӧ, Сыктывдінкарын вӧлі митинг.

Вель уна йӧзыс чукӧртчылісны. Нахлупин, Буткин, Неволин да Полещиков висьтавлісны, кыдзи, мый понда пансьыліс дас во сайын война, кыдзи ӧні тайӧ лунъясас ставмувывса уджалысь йӧзыс чукӧрӧн ӧтвылысь чорыда шуӧны, оз пӧ ков война, огӧ пӧ лэдзӧй озыр йӧзлы асьнымӧс ылӧдлыны.

Сэсся Липовскӧй висьталіс, кыдзи мунӧ отсӧг став му вылас уджалысь йӧзлы, кодъясӧс правительствоясыс, вӧля корсьӧм понда, тюрмаясын видзӧ, да найӧ семьяяслы («Мопр» йылысь).

Площадь вывсянь став йӧзыс мунісны мӧд площадь вылӧ, еджыдъяс дырйи усьӧм йӧз гу дорӧ (братская могила).

Сэні Сыктывкарса йӧз ӧтлаасисны ставмувывса уджалысь йӧзыскӧд, шуисны накӧд тшӧтш, восьтам пӧ войнаяслы война, кыпӧдасны кӧ пӧ озыр йӧз бара кось, ми пӧ отсалам ставмувывса уджалысь йӧзыслы бергӧдны оружйӧсӧ озыр йӧз вылас, вӧчны революция.