70 ЧЕЛЯДЬ КОЛЬӦНЫ ВЕЛӦДЧЫТӦМӦСЬ

Йӧрӧсдінса мужикъяс (Ыб вӧлӧсьтын, Емдін карулын) кык во чӧж нин, 1922 дай 23 воӧ, корисны школа. Став рӧскодсӧ вӧлі босьтӧны ас вылас, велӧдысьлы мынтӧм кындзи. Отдел народного образования шуис: восьтам пӧ, сӧмын пӧ асьныд тшӧтш велӧдысьыслы мынтӧй. Эз босьтчыны Йӧрӧсдінсаяс, повзисны судзсьытӧмысь. ОЛӦ ДЕРЕВНЯЫД ШКОЛАТӦГ. 70 челядь олӧны школа сайын, сідзи и кольӧны велӧдчытӧмӧсь. Эм эськӧ школаыс 2 верст сайын, Ыбын, сӧмын челядьыдлы сьӧкыд ветлыны — ва сайын.

Мый нӧ татчӧ верман шуны Йӧрӧсдінса мужикъяслы? Велӧдчӧмыд ёна колӧ, асьныд тӧданныд, ОБОНО-ыд эз вермы восьтынытӧ — сьӧмыс абу. Артыштӧйтӧ асьныд, дерт эськӧ кыдзкӧ-мыйкӧ кӧ старайтчыштінныд, ӧти велӧдысьтӧ ӧд эськӧ вермид жӧ вердныд. УНА-Ӧ НӦ ӦТИКЫДЛЫ КОЛӦ? Пӧльзаыс эськӧ тіянлы дай челядьыдлы мыйта вӧлі.

Сэсся позьӧ шуны тадзи: Ыбад, школа бердас, позьӧ вӧлі ыліджык челядьыдлы лӧсьӧдны ӧтласа оланін (общежитие). Таво — 1924/5 восянь ОБОНО-ыд школаяссӧ содталӧ. Гашкӧ, Йӧрӧсдінад восьтас жӧ да — юалӧй!

ЙӦРӦСДІНСА.