УНДЖЫКЫС КОМИ ЙӦЗ, УДЖСӦ МЫЙЛАКӦ НУӦДӦНЫ РОЧӦН

Сыктывкарын мунӧ ӧні нардомъясын, лыддьысян керкаясын, библиотекаясын уджалысьяслӧн курс. Чукӧртчӧмаӧсь тӧлкуйтны, кыдзи бурджыка, регыдджыка югдӧдны велӧдчытӧм пемыд йӧзӧс, кыдзи налы овны сӧвет власьт тшӧктӧм серти.

Удж зэв ыджыд, зэв колантор. Тӧлкуйтысьяс ставыс пӧшти ас коми йӧз, комиӧн сёрнитысьяс. Ме ногӧн, налы колӧ эськӧ уджсӧ нуӧдны коми кывйӧн, сы понда, ӧти-кӧ, ас кывнад бурджыка, повтӧгджык вермасны гӧгӧр тӧлкуйтны, кыдз-мый колӧ вӧчны, мӧд-кӧ, оз ӧмӧй быдӧн найӧ тӧдны, сӧвет правительствоыд тшӧктӧ ӧні быдлаын, быд учрежденньӧын, уджъяс нуӧдны чужан кывйӧн, миян — комиӧн. Оз ӧмӧй ков тӧлкуйтысьясыслы, йӧзсӧ югдӧдысьяслы, медвойдӧр аслыныс туйсӧ восьтыны коми кыв вылын; найӧ, кывзан да, пыр на мунӧны важ туйӧдыс — рочӧн.

Тадзи кӧ пондасны уджавны гырысьяссяньыс, велӧдысьяссяньыс, дыр на ковмас коми пемыд йӧзыдлы виччысьны югыд туй вылӧ петӧмтӧ.

Коми гражданин.