ОВМӦС ОЗ ОР

Сёрни оз вермы лоны.

Таво эськӧ ӧткымынлаын миян Сӧветскӧй Союзын няньясыд эз воны, сӧмын ещӧ на уджалысь йӧзлӧн кольӧ лишка, 345 миллион пуд нянь. Лишкасӧ сійӧс позяс вузавны. Сымда кымын жӧ вӧлі кольӧм во.

Кольӧм во вӧлі абу став му вылас кӧдзӧма, войнаӧдз вӧлі унджык кӧдзсьӧ. Таво вӧлі кӧдзӧма 85−90% став мусьыс, а кольӧм во сӧмын 77%. Сы понда таво весиг сёрни оз вермы лоны тшыгъялӧм йылысь, кӧть эз быдлаын во няньыд.

Дерт эськӧ, сэтшӧм местаясас оз тырмы няньыд сёйнытӧ, сӧмын тшыгъявны оз ло: неунаыс колян вося на эм, сэсся ваясны няняинысь. Важ няньсьыс 1,000,000 пуд нянь нин лэдзӧма вузавны. Сэсся мукӧд губерняысь вайӧма 400,000 пуд.

Колян во дорысь му чинтӧм йылысь сідзжӧ сёрни оз вермы лоны. Кӧні нянь абу воӧма, государство сетӧ 9,000,000 пуд кӧйдыс — тырмас быдӧнлы.

Мед эськӧ крестьянаыс скӧтсӧ эз вузавлыны, эз сёйны, мед вермасны мӧд воӧдз видзны, государство сетӧма 8,000,000 шайт.

Полӧмъяс бырины.

Кор ещӧ йӧзыс оз на вӧлі тӧдны, уна-ӧ оз понды тырмыны нянь, мукӧдлаын нянь доныд пондыліс содны, скӧт донтӧммыліс, бырліны ӧткымын тӧваръяс. Виччысьӧны вӧлӧм бара тшыгъялӧм.

Кор сэсся правительствоыд мӧдӧдіс няньтӧ сэтшӧминъясад, полӧм быри. Сьӧлӧмъяс йӧзлӧн личмуніны. Донъяс лоины важ кодьӧсь. Деньга дон эз усь.

Няньлӧн дон.

Правительство миян ёна старайтчис нянь донтӧ содтыны, мед эськӧ крестьянаыслы убытка эз вӧв. Сӧмын няньсӧ вӧлі воштыныс некытчӧ, сы понда вӧлі оз позь зэв лэптыны донсӧ.

Сэки сӧветскӧй власьт заводитіс няньтӧ ыстыны мукӧд государствоӧ (заграничаӧ) — нянь доныд лои чорыдджык. Шӧр доныс вӧлі таво миян Союзын 50 ур. Ӧні чайтӧны, позяс ещӧ неуна содтыштны нянь донтӧ. Сӧвет власьтлӧн эм лишка няньыд уна — вывті кӧ нин пондасны купечьяс донтӧ лэптыны, сійӧ пырысь-пыр вермас донтӧмджык нянь сэтчӧ ыстыны. Сідзитӧ позяс нянь вылад ӧти дон кутны.

Вузасьӧм заграничакӧд оз быр.

Дерт, ми важ дорысь няньтӧ этшаджык нуам мукӧд государствоад. Нянь вузалӧмыд миянлы сетліс медыджыд доход. Таво на нянь вузалӧм понда миянлы мукӧд государствосянь деньга воис 100,000 шайтӧн унджык налы мынтӧм дорысь.

Ассьыным зарнитӧ ми сідзкӧ огӧ видзӧй.

Оз-ӧ миянлы ковзьы ӧні мукӧд государстволы мынтысьны зарниӧн? Гашкӧ, няньыд да тӧварыд аслыным оз тырмы? Оз ковзьы.

Нянь пыдди пондам сэтчӧ мукӧдтор вузавны: вый да мукӧдтор.

Овмӧс Сӧветскӧй Союзлӧн оз ор.

Сідзкӧ кӧдзаяс оз чинны, скӧт лоӧ видзӧма, пабрик-заводъяс пондасны важ моз уджавны, деньга дон оз усь, мукӧд государствокӧд важ моз пондам вузасьны — насянь сымда жӧ миянлы воас деньга, мыйта войдӧр воліс.

Сідзкӧ овмӧс Сӧветскӧй Союзлӧн оз ор.

Сӧмын колӧ уджавны ёна, бура уджавны.