СТАВМУВЫВСА СЪЕЗДЪЯС

Тӧлысьӧн-джынйӧн, юнь тӧлысь 15-ӧд лунсянь кымын юль тӧлысь помӧдз чукӧртчылісны ставмувывса съездъяс (конгрессъяс). Муртса помасис 5-ӧд конгресс ставмувывса коммунист партияяслӧн (Коминтернлӧн), пырысь-пыр заводитчис 3-ӧд конгресс профессиональнӧй союзъяслӧн (Профинтерн). Ӧтпырйӧн вӧліны съездъяс ставмувывса коммунистическӧй союз молодёжилӧн. Сэки жӧ чукӧртчылісны ставмувывса коммунисткаяс сёрнитны ставмувывса нывбаба кост удж йылысь (3-ӧд конференция).

Тайӧ съездъясыс вӧліны миян Сӧветскӧй Республикаын, миян гӧрд карын — Мӧскуаын.

Мый понда Мӧскуаын? Мукӧдлаын власьтсӧ ӧнӧдз на кутӧны озыр йӧз. Найӧ дзескӧдӧны, топӧдӧны уджалысь йӧзӧс. Сы понда уджалысь йӧз дай налӧн партияыс — коммунист партия — вермӧ чукӧртчыны сӧмын гусьӧникӧн, мед «гырысь» йӧз оз тӧдлыны. Гусьӧникнад ӧд ыджыд съездтӧ он чукӧрт — аддзасны.

Став му вылас сӧмын миян Сӧветскӧй Союзын власьтыд уджалысь йӧз киын. Сы понда уджалысь йӧз вермӧны, кор ковзяс, чукӧртчыны, сёрнитны асланыс олӧм-вылӧм йылысь. Сы понда ставмувывса коммунист партия вермӧ чукӧртчыны Мӧскуаын сёрнитны, кыдз ӧтувтны эмбуртӧмъяссӧ мукӧд государствоысь, кыдз найӧс кыпӧдны водзсасьны озыръяскӧд, кыдз босьтны рабочӧйяслы да крестьяналы власьтсӧ ас кианыс.

Мӧскуаын, гӧль йӧзӧс бур туйӧд нуӧдысь гу дорын, т. Ленин гу дорын, ставмувывса коммунистъяслӧн бӧрйӧм йӧз сетӧны мӧда-мӧдыслы кыв: нуӧдны гӧль йӧзӧс Ленин индӧм туйӧд выль бур олӧмлань, кыпӧдны найӧс, велӧдны босьтны ас кианыс власьт.