ИПАТЬЫН (ЕМДІН КАРУЛЫН)

Ипатьын, Прокопьевскӧй вӧлӧсьтын, Хлебопродуктлы агенталӧ Ипатьса Рогов Е. Л.

Вузасьӧ аслас керкаас. Тӧварыс мыйкӧ, нянь да сов, эськӧ эм. Сю вузалӧны 1 шайт 60 урӧн. Сов — 2 ш. 10 ур.

Вузасьӧ агент и заготовка удж нуӧдӧ. Кыдзи уджалӧ? Ачыс морт омӧля велӧдчӧм. Нуӧдӧны уджсӧ ас пыддиыс мукӧд: войдӧр вӧлі саломщик Марков, ӧні поп Авениров.

Донъяс ёна частӧ вежласьӧны, ӧти дон тӧвар вылӧ абу. Муртса кӧ юыштас унджык Роговыд — доныд тӧвар вылад пыр и содыштас. Солыд дзонь шайт вылӧ донаджык Роговыдлӧн Хлебопродукт лавка дорысь.

Заготовкаыд бара кыдзи мунӧ? Чорыд донъяс сылӧн ур вылӧ ни нинӧм вылӧ абу жӧ. Ӧти партия ньӧбас, шуам, 16 пуд сюысь, мӧдӧс — 30 п., мукӧддырйи ветымынӧс сетас. Донъялӧны сідзи — коді кодӧс вермас ылӧдны.

Вузасиг-ньӧбасигӧн сэсся ӧд оз позь юышттӧг: заводитныд заводитасны, сэсся и мӧдас... Чукӧрмасны Рогов дінӧ морт дас дай пируйтӧны.

Уна быдсямаыс овлывлӧ Роговлӧн. Асьсӧ сійӧ вывті нин вылӧ пуктыны пондӧма: некутшӧм власьт некодлысь ас вылас оз тӧд. Ме пӧ «ачым».

Хлебопродуктыслӧн отделенньӧыс Емдін карын оз на ӧмӧй тӧд, кутшӧм мортӧс сійӧ Ипатьын видзӧ? Тӧдӧ жӧ кӧ ӧд-а...

Ипатьса.