ЙӦЗЫС САДЬМӦМАӦСЬ

Став му вылас тайӧ лунъясӧ, вежон чӧж, уджалысь йӧз ӧтувтчӧмӧн чорыда шуалӧны озыр йӧзлы: став выннымӧс пуктам — огӧ лэдзӧ тіянӧс выль война панны.

Став му вылас кыпӧдчӧмаӧсь уджалысь йӧз — петкӧдлӧны ӧтувтчӧмӧн, кутшӧм вын найӧ кутӧны ас кианыс.

Ёна водзӧ воськовтӧмаӧсь тайӧ дас вонас уджалысь йӧз. Ӧтувтчӧмӧн чукӧртӧны вынсӧ водзсасьны капиталистъяскӧд. Пыр топыдджыка матысмӧны коммунист партия дінӧ став му вылас уджалысь йӧз, сувтӧны коммунист партия веськыд туйӧ.

Тайӧ лунъясӧ быд государствоын коммунист партияяс ыджыд гӧлӧсӧн чукӧстчӧны эмбуртӧмъяс дінӧ, уджалысьяс дінӧ: висьтавлӧны налы, мый понда пансьӧма вӧлі важ война, кодлы сійӧ бурсӧ вайӧма да мый понда ӧнӧдз на оз помась озыр йӧзлӧн думъяс война йылысь. Коммунист партияяс оз ылӧдлыны уджалысь йӧзӧс, висьтавлӧны веськыда, кыдзи пӧртлісны синъяссӧ уджалысь йӧзлысь дас во сайын, война пансигӧн, капиталистъяслӧн отсасьысьясыс — быдсяма пӧлӧс «социалистъяс» 2-ӧд Интернационалысь. Кыдзи найӧ войдӧр горзісны: «Оз пӧ ков война», — а кор войнаыс пондіс пансьыны, вунӧдісны важ сёрнисӧ, вунӧдісны ставмувывса эмбуртӧм йӧзлысь ӧтувтчан уджсӧ, «благӧслӧвитісны» войнасӧ. Кыдзи найӧ велӧдісны — ыстісны уджалысьяссӧ война вылӧ, ассьыныс государствояссӧ дорйыны, мӧда-мӧдсӧ виавны.

Ӧні сідз жӧ, быд государствоын сэтшӧм пӧлӧс «социалистъясыс» горзӧны, оз пӧ ков война, а гусьӧникӧн, уджалысьяс мыш сайын, капиталистъяскӧд налысь уджсӧ нуӧдӧны — тӧждысьӧны, кыдзи бурджыка ылӧдны эмбуртӧмъясӧс, кыдзи бара найӧ вирӧн-лолӧн перйыны, содтыны озырлун капиталистъяслы.

Сӧмын ӧні быд государствоын эм коммунист партия, сӧмын ӧні уджалысь йӧз садьмӧмаӧсь. Коммунист партия велӧдӧмӧн найӧ вермасны ӧні шуны война пансигӧн, кыдзи ӧні, тайӧ вежонас, став му вылас шуӧны: оз ков война.