ОЗ КОВ ВОЙНА

РЕВЕЛЬ (Эстонияын). Рабочӧйяс асланыс газет пыр чукӧстчӧмаӧсь став рабочӧйяс водзын, мед август 3 лунӧ став Эстония пасьтаыс рабочӧйяс петасны ывла вылӧ да ӧтлаӧ чукӧртчӧмӧн чорыда шуасны ассьыныс кыв война панӧмъясысь ӧтдортчӧм понда.

ВАРШАВА (Польшаын). Коммунист партия, колян ыджыд война пансьӧм 10 во тыран лунсянь, вежон чӧж чуксалӧма рабочӧйясӧс, мед найӧ водзӧ кежлӧ татшӧм войнаястӧ панысьяскӧд кутчысясны вермасьны быд ногӧн.

БЕРЛИН (Германияын). Германскӧй коммунист партия чукӧстчӧма рабочӧйяс водзын, шуӧма, колӧ пӧ быд ногӧн ӧтдортны выль война пансьӧмъяс, ас кипод улӧ босьтны власьт, регыдджык шыбитны ас сьылі вылысь буржуйясӧс, сӧмын тадзӧн позяс водзӧ кежлӧ мынны войнаясысь.

Оз пӧ войнаыд ков.

СТОКГОЛЬМ (Швеция столича). Том войтырлӧн союзыс тшӧтш коммунист партиякӧд лӧсьӧдчӧ нуӧдны йӧз костын вежон чӧж агитация, мед уджалысь йӧз водзӧ кежлӧ оз лэдзны озыр йӧзӧс война панны.

Война панысьяскӧд вермасьӧны.

ЛОНДОН (Англияса столича). Англияса коммунист партия аслас газет пыр шыӧдчӧма салдат-матросъяс дінӧ, мед найӧ ӧтувтчасны война панысьяскӧд вермасян ячейкаясӧ, да мед татшӧм ячейкаясыс быд ногӧн пондасны югдӧдны юр вежӧр став салдатыслысь, матросыслысь, рабочӧйясыслысь капиталистъяс кипод улысь мездысьӧм понда. Шыӧдчӧмын коммунист партия шуӧ, колӧ пӧ дугдыны лыйлыны капиталистъяс тшӧктӧм серти ассьыныд уджалысь ёртъястӧ да винтовкаястӧ бергӧдны буржуйясыс вылӧ.

ПАРИЖ (Франциялӧн столича). Коммунистъяс профсоюзъяскӧд ывла вылӧ петавлӧмаӧсь, ӧтлаӧ чукӧртчывлӧмаӧсь, шуӧмаӧсь война пансьӧмъяскӧд водзӧ кежлӧ ёна вермасьны. Став чукӧртчӧм йӧзыс мунӧмаӧсь Гӧрд знамя дорті. Тайӧ знамясӧ сетӧмаӧсь францияса эмбуртӧмъяслы мӧскуаса рабочӧйяс.

Оз ков война.

МӦСКУА. Дас куим литературнӧй союз ыстӧмаӧсь мукӧд муясын олысь литераторъяслы (гижӧм вылын уджалысьяслы) письмӧ, мед найӧ ӧтвылысь кутчысясны вермасьны война панӧмъяскӧд, шуӧны, капиталистъяс пӧ войнаяснад уджалысьястӧ сӧмын ас кипод уланыс гартыштӧны, кӧртавлӧны.