КЫДЗИ ВОДЗВЫВ ТӦДНЫ ПОВОДДЯ ВЕЖСЬӦМ

Крестьяналы зэв ковмылӧ гожӧмын водзӧ вылӧ тӧдны поводдя вежсьӧм. Мукӧд тӧдмалӧны сійӧс тӧв серти. Таысь ӧприч, поводдя позьӧ тӧдмавны мукӧд примета серти.

Тӧв вежласьӧм.

Кӧлӧ приметитны быд 2 час мысти. Вежсьӧ кӧ сійӧ шонді мунӧм серти, сэк шусьӧ тӧв вежсьӧ веськыдвылӧ, мӧдарӧ кӧ — шуйгавылӧ:

1. Рытыв тӧв веськыдвылӧ мунігӧн унджыкысь вайлӧ зэр.

2. Асыв тӧв, мунӧ кӧ сідз жӧ, висьталӧ кос поводдя.

3. Рытыв и асыв тӧв шуйгавылӧ вежсигӧн поводдя вежӧны мӧдарӧ.

4. Вежсьӧ кӧ лун тӧв (торъя нин рытыввылӧ), пыр нин зэр водзын. Первой заводитас кымрасьны, сэсся зэрыштавны, мыйӧн воас вой тӧлӧ — сэки поводдя дзикӧдз тшыксьылӧ.

5. Бергӧдчӧ кӧ вой тӧв кодарӧкӧ — сэки позьӧ виччысьны бур поводдя; ёнджыка надейтчыны бур поводдя вылӧ позьӧ, кор вой тӧв бергӧдчӧ асыввылӧ.

Кымӧр ветлӧм.

1. Оз кӧ разавны рытлань чукӧра кымӧръяс — сэки колӧ виччысьны поводдя торксьӧм.

2. Оз кӧ мун кымӧр тӧв серти, а локтӧ (мышкӧн кӧ сувтны тӧвлы) веськыдвывсянь — сэки сідзжӧ поводдя торксьӧ.

3. Луннас кӧ мича, кымӧртӧм, а рытланьыс кӧ лоӧны кымӧръяс да сукмӧны — поводдя торксьылӧ.

4. Мича поводдя дырйи кӧ лоӧны вурун кодь кымӧръяс луна-рыта костын да тӧдчӧмӧн ӧдйӧ кыптӧны — сэки 1−2 лун мысти дыр кежлӧ тшыксьылӧ поводдя.

Мукӧд пӧлӧс примета.

1. Рытсянь кӧ шонді пырӧ кымӧръяс улӧ да кымӧр костысь кайӧ шондісянь югӧрыс столбӧн-столбӧн — сэки колӧ виччысьны зэра поводдя.

2. Кодзувъяс кӧ асывладор ёна ворсӧны — зэр водзын.

3. Бур поводдя дырйи да лӧнь дырйи бура кӧ кылӧ ылӧдз звӧн шы, паракод шы, горзӧм шы, мукӧд пӧлӧс шы — сэки поводдя торксьылӧ.

Барометр.

Колӧ кӧ тӧдмавны поводдя ӧшыбкатӧг — колӧ видзӧдлывлыны барометр вылӧ.

1. Инданыс кӧ (стрелка) сылӧн лэччӧ улӧ — сійӧ висьталӧ поводдя тшыксьӧм.

2. Кымын дыр нюжалӧ лэччӧмыс зэрмытӧдз, сымын дыр оз справитчы поводдя.

3. Поводдя справитчӧм водзын — инданыс сылӧн кайӧ вылӧ.

4. Крута кӧ каяс — сэки оз позь надейтчыны дыр кежлӧ поводдя мичаммӧм вылӧ.

Т.