ОТСА «ЧУДЕСА»

Отйын (Емдін карулын), куим верст сайын, эм часовня. Петыр лун бӧрын первой вӧскресенньӧӧ волӧны сійӧ часовняӧ быдлаысь зэв уна йӧз ва вежӧдӧмӧн молебен сьылӧдны.

Часовня дортіыс визувтӧ ичӧтик шор, сэтысь суклясьӧм васӧ нуӧны кевмысьысьяс гортаныс сулеяясӧн, шуӧны — зэв пӧ лӧсялӧ быд висьӧмысь.

Таво, воддза вояс моз жӧ, йӧзыд чукӧртчывлісны. Кевмысигад казялӧмаӧсь зэв ыджыд «чудеса»: пу ув вылӧ пуксьӧма важ ӧбраз, кӧсйӧма буракӧ эськӧ лэбны енэжӧ, да пуыс, дерт, кутӧма, зэв тай жугыля вӧлӧм пукалӧ-а. Тайӧ ӧбразыс «лэбзьытӧдзыс» дыр нин туплясьӧма шорас, да окота, буракӧ, лоӧма лэбзьыны райӧ, няйтад ӧд куйлынытӧ абу зэв ёмкыд.

Кевмысьысьяс ёна шензьӧм бӧрын шуӧмаӧсь: тайӧ пӧ «новоявленнӧй», сы понда сувтӧдӧмаӧсь выль крест.

Дугдӧй, йӧй йӧз, кывзыны сёрни-басни татшӧм «новоявленнӧйяс» да мощияс йывсьыд! Сӧмын тіянӧс йӧйтӧдлӧны попъяс да озыр йӧз, налы ӧд татшӧм «новоявленнӧйясыд» тыртӧны зепъяснысӧ.

Г. В.