ПЛЕНУМ ОБЛАСЬТУВСА ИСПОЛНИТЕЛЬНӦЙ КОМИТЕТЛӦН

Вӧр лэдзӧм йылысь

24-ӧд лунӧ юль тӧлысьын Областнӧй Исполнительнӧй Комитет кывзіс доклад вӧр лэдзан удж йылысь.

Областнӧй Леснӧй Отделын уджалысь Рудаков висьталіс: уна-ӧ вӧр лэдзӧма таво Коми Обласьт кузя, да уна-ӧ дон. Медся уна лэдзӧмаӧсь:

Северолес — 658,039 кер да 380,475 шпал.

Руссголландолес — 176,154 кер да 72457 шпал.

Руссанглолес — 81,111 кер да 24,749 шпал.

Сэсся ещӧ лэдзӧмаӧсь вӧр: Отдел местного хозяйства, государственнӧй учрежденньӧяс. Крестьяналы вӧлі сетӧма 197,545 куб. сажень вӧр пес вылӧ да мукӧдтор вылӧ.

Воысь воӧ миян вӧр лэдзан уджыд содӧ. Таво лэдзӧма вӧрсӧ 5-ысь унджык 1921 во дорысь.

Став вӧрыс таво лэдзӧма 1,670,642 шайт 82 ур дон.

Тайӧ деньгасьыс 859,551 шайт 9 ур кольӧ областнӧй бюджетӧ (областнӧй рӧскод вылӧ).

Мӧд во кежлӧ оз на позь помӧн шуны, кымын кер да шпал лоӧ лэдзӧма, сӧмын Леснӧй отдел чайтӧ, став вӧрыс мӧд во лоӧ лэдзӧма 2,000,000 шайт дон.

Тайӧ доклад бӧрын Северолесын уджалысь Беляев висьтавліс, кыдзи уджалӧма Северолесыс, кыдзи вӧр лэдзысьясыс уджалӧмаӧсь.

Беляев висьталӧм бӧрын Исполкомса шленъяс да мукӧд кывзысь ёртъяс висьталісны: Северолесыдлӧн пӧ уджыс абу зэв шыльыда мунӧма. Зэв частӧ служащӧй да вӧр лэдзысьяс костын зык вӧвлӧма. Наперво, служащӧйяс — важ леснӧй приказчикъяс да код да — век на важ мозыс и олӧны-уджалӧны, дядьӧыдлы не проч и пиняс сетны. Мӧд-кӧ, удждонсӧ вӧлі мынтӧны тӧварӧн. Мед эськӧ нин, шуам, тӧварӧн мынтісны да тӧварсӧ мукӧддырйи тшыкӧмӧс вӧлі сетӧны. Дерт сэсся дядьӧясыд зыкӧ воасны. Олӧмыс, бара жӧ, вӧр керкаад зэв сьӧкыд вӧлі — унаӧн висьмисны. Сёрнитысьяс индісны, водзӧ кежлӧ пӧ колӧ старайтчыны вӧчны выль вӧр керкаяс джоджӧн, ӧшиньӧн и пачӧн. Сэсся пӧ колӧ удждонсӧ сетны деньгаӧн, тӧварӧн мынтысьны позьӧ сӧмын водзвыв уджалысьяскӧд сёрнитӧмӧн. Колӧ пӧ вӧр лэдзысьястӧ страхуйтны, мед пӧ висьӧмӧ усигӧн ли, мукӧд пӧлӧс пикӧ воигӧн ли, дзик пыр дядьӧыд корысьӧ эз пӧр.

Сэсся пӧ колӧ уджалысьяссӧ Северолесысь вежны, прамӧйджык сӧветскӧй йӧзӧс, крестьяна дор уджалысьясӧс, пуксьӧдны.

Вӧр лэдзан уджсӧ пӧ миян Коми муын позьӧ на ещӧ паськӧдны, унджык пӧ позьӧ кертӧ лэдзны, унджык доход вӧрысь лоас.

Ещӧ ӧтитор вылӧ индісны — Северолес пӧ, договор серти, Обисполкомлы кӧсйысьӧма Лесопильнӧй завод стрӧитны. Ӧнӧдз на сійӧ уджыс абу вӧчӧма. Колӧ пӧ тэрмӧдлыны Северолестӧ.

Исполкомлысь шуӧмсӧ тайӧ докладъяс да сёрни кывзӧм бӧрын мӧд газетын гижам.