ЕМДІН КАРУВСА ОЛӦМ

«Доброхим».

Кымынкӧ морт чукӧртчылісны сёрнитны «Доброхим» йылысь, бӧрйисны бюро, индалісны налы удж. Шуисны нуӧдны кымынкӧ собранньӧ большевикъяскӧд, Р. К. С. М-кӧд, профессиональнӧй союзӧ пырӧм войтыркӧд да гражданакӧд. «Доброхим» чукӧръяс тайӧ бюро бӧрйытӧдз вӧліны нин От вӧлӧсьтын да Уездвоенкоматын. Бюролы колӧны квитанционнӧй нигаяс да шленъяслы сетавны билетъяс.

О. Д. В. Ф.

Сынӧдӧд лэбалан машинаяс лӧсьӧдны тӧждысьысьяс лӧнисны — сувтіскодь налӧн уджыс. Шленъясӧс выль пӧв гижалӧм сӧмын на заводитчӧ. Удж сувтӧмсӧ шуӧны ки судзсьытӧмла: коді пӧ шойччыны муніс, кодӧс ыстісны уджавны мукӧдлаӧ. Збыль кӧ шуны, этша жӧ уджалысьыс; киныс збыльысь оз тырмы.

Крестьянинлысь удждысьӧм.

Заводитчис разӧдӧм Удждысяна билетъяс крестьяна костӧ. Кымынкӧ мортӧс билетъяснас ыстісны вӧлӧсьтъясӧ. Областнӧй Финотделлы кыдзкӧ-мыйкӧ мӧд ногӧн колӧ лӧсьӧдны разӧдавны татшӧм билетъястӧ. Ӧнія лӧсьӧдӧм ногыс абу шань: страдна дырйи крестьяниныд ветымын верст сайӧ оз мун билетыдла, недапӧштӧ куимсё, нёльсё верст сайӧ. Ветлысь-мунысьяс пыр разӧдӧмыд абу жӧ бур — оз вермыны найӧ вузавлыны билетъястӧ лючки. Шуам, сійӧ мортыд локтіс талун, а крестьяниныдлӧн буретш сьӧмыс грӧш абу. Лун кык-куим мысти эськӧ сійӧ и лоӧ, да мортыс оз виччысь: некор сылы виччысьныс, мӧд удж вылӧ петӧма. Медбур, миян ногӧн кӧ, разӧдны билетъястӧ исполкомъяс пыр да кооперативъяс пыр.

Электрификация.

Емдінса ЕПО лӧсьӧдӧ мельнича, кӧсйӧ сувтӧдны электрическӧй станция. Собранньӧ вылын шуисны удждысьны быдлаысь, кысь толькӧ позьӧ, сӧмын мед электричество артмас. Бура кӧ пондас уджыс мунны, ар кежлӧ крестьяналы югыд донтӧм би сетасны.

Норасьысьяс.

Емдін карувса Исполкомӧ волісны норасьысьяс Сереговсянь. Сов перъян заводын удж нуӧдысьясыс да Отместхоз кык во сайын нин кӧсйылӧмаӧсь вӧчны уджалысьяслы да крестьяналы клуб да школа, да абу на вӧчӧмаӧсь. Норасьысьяс зэв ыджыд гижӧдӧн кайисны Сыктывдінкарӧ. Норасьӧны сизим медгырысь Обласьтувса удж нуӧданін вылӧ.

Туй вӧчӧм.

Олӧм вылад Емдінсаяс лючкиджык кутісны видзӧдны. Аддзӧны: лишнӧй сьӧм государстволӧн ни Обласьтлӧн абу, туйяс омӧльӧсь — асьныс пондісны лӧсьӧдавны. Уисполком чукӧстчӧмӧ лӧсьӧдавны туйяс медводзын чукӧстчисны Пальсаяс, Чассаяс да Прокопьевскӧй вӧлӧсьтсаяс. Тайӧ куим вӧлӧсьтсаыс бура ёна уджалісны, налысь уджсӧ арталӧны 3.000 шайтӧн. Айкатылаын, Зӧвсьӧртын да Гамын собранньӧяс вылас шуӧмаӧсь жӧ туйяс вӧчавны. Сӧмын нин Емдінсаяс узьӧны. Асланыс эськӧ, Емдінсаыслӧн, туйясыс медомӧльӧсь: подаяс весиг сибдалӧны, вӧлаясыд эськӧ сибдаласны нин да.

Емдінсаяс зільӧсь да сюсьӧсь мӧдарӧ: поп челядьлы тэрмасисны сетны муяс, ӧні крестьянаӧс обществоас оз сибӧдны: муным пӧ абу. Зэв ыджыд бур вӧчисны Емдінсаяс и озыр купечлы — Камбаловлы: Вӧлӧстнӧй съездӧн мездісны сійӧс вӧлӧсьтув вотысь.

Рам.