МЫЙ ШУӦНЫ РОЧЬЯС КОМИ ЙӦЗ ЙЫЛЫСЬ

Коми йӧзӧс ас торъя обласьтӧ торйӧдчигӧн матігӧгӧрса рочьяс вӧлі зэв ёна сералӧны: нинӧм пӧ оз артмы торйӧдчӧмӧн, сӧмын йӧзсӧ водзӧ пемдӧдасны да рӧзӧритасны. Коми йӧзтӧ найӧ вӧлі шуӧны йӧй войтырӧн, миянлысь Коми Обласьтсӧ — комическӧйӧн.

Ӧні кывзан налысь сёрни да, шуӧны дзик мӧд ногӧн: комиыд пӧ миянӧс, тыдалӧ, коляс велӧдчӧмнас, овмӧс кыпӧдӧмнас, со кутшӧм чорыда пӧ кутчысисны ас йӧз понда. Яренскгӧгӧрса рочьяс воддза воясас нин вӧлі казялӧмаӧсь миян обласьтын олӧмсӧ, ёна каитчисны ӧтлаасьтӧм понда. Ӧні на эськӧ сёрниталӧны да, сӧмын полӧны коми кыв учрежденньӧясӧ сюйӧмысь, ковмас пӧ велӧдчыны коми кывйӧ. Коми йӧз пӧвстӧ пырӧма нин уна рочногса олӧм, вунӧдӧмаӧсь нин вӧлі ас кывйӧн сьыланкывъяс, сьылӧны рочӧн, асьныс оз тӧдны, мый сьылӧны, рочыс кӧ кывзас — нинӧм жӧ оз гӧгӧрво. Ӧні кывзан да, сьылӧны коминад весиг матігӧгӧрса роч челядьяс, сӧмын асьныс, миян моз жӧ, оз тӧдны кывъяссӧ. Та серти кӧ думыштан, коми йӧзыд роч син водзын водзысь водзӧ кыпӧдчӧ, югдӧдчӧ, ёнмӧ. Колӧ ещӧ чорыда кутчысьны ас йӧзӧс югдӧдӧмӧ да регыдджык сюйны учрежденньӧясӧ ас кыв, сэки ещӧ на ӧдйӧ пондам водзӧ мунны.

П.