КЫК КӦЧ БӦРСЯ ВӦТЧЫНЫ ОЗ КОВ

Ёна нин вӧлі гижӧма «Югыд туй» газетын звер-пӧтка вылӧ окотитчӧм срокъяс йылысь, заказникъяс йылысь (кӧні оз позь во гӧгӧр кыйсьыны), мукӧдтор йылысь. Гижӧма вӧлі, кыдзи мыждӧны, водз кӧ кутан кыйсьыны либӧ заказникъясын кӧ кутан окотничайтны.

Сӧмын ставыс сійӧ, тыдалӧ, гижӧмас кольӧма, некод сы серти оз вӧч. Весиг Союз окоталӧн шленъясыс мукӧдлаас оз вӧчны закон серти, видзӧдӧны став законыс вылӧ чунь пырныс.

Ме неважӧн вӧлі Донын (Кулӧмдін карулын). Сэні эм заказник — «Донты», кӧні оз позь во гӧгӧр кыйсьыны. Сӧмын сы вылӧ некод оз видзӧд: кыйсьӧны коді кыдз вермӧ, срокыс эм ли, абу ли — ставыс веськодь. Кулӧмдін карувса Союз Окоты узьӧ, сылы некутшӧм мог быттьӧ абу. Пемыд йӧзыд кыйсьӧ, виӧ пӧткатӧ сёӧн-сёӧн.

Татшӧм кыйсьӧмыд быдлаын мунӧ, став Коми Обласьт пасьтала. Срокъяс видзӧдӧны сӧмын Сыктывдінкарын да уезднӧй каръясын, вӧлӧсьтъяслы некутшӧм срок абу — кор окота мунӧны, лыйсьӧны.

Мыйла тадзи?

Мужикыд миян пемыд, оз гӧгӧрво, мыйла кыйсьыны срокъясӧдз оз позь, мыйла заказникъяссӧ лӧсьӧдалӧма. Лючки висьтавны та йылысь деревняса мужикыдлы некодлы. Союз окотаяс некутшӧм культурнӧй удж оз нуӧдны, ставныс кутчысьӧмаӧсь тӧргуйтны, кӧть налӧн тӧргуйтӧмыс некытчӧ шогмытӧм. Шуны кӧ, кык кӧч бӧрся вӧтчӧны, сӧмын некодсӧ кыйны оз вермыны.

Ог тӧд, мыйкӧ кӧсйӧ оз вӧчны Обласьтувса Союз Окоты? Сылы эськӧ вӧлі висьталӧма уполномоченнӧйяс чукӧртчылӧм вылын босьтчыны прамӧйджыка окота удж бердас. Буракӧ, сійӧ нинӧм на жӧ абу вӧчӧма, пыр на кыйсьӧм йылысь законъястӧ быдлаын пыдди оз пуктыны.

Сідзкӧ, ковмас власьтлы та дорӧ кутчысьлыны. Быд вӧлӧсьтын эм милиция, сійӧ куталӧ сэтшӧм кыйсьысьяссӧ да судӧ сеталӧ — сэки, гашкӧ, лоӧ ичӧтик полӧм законъястӧ кытшовтӧмысь.

Сэсся оз позь ошкыны миянлысь му-видз лӧсьӧдалысьясӧс — таксаторъясӧс. Найӧ эськӧ грамотнӧй йӧз нин, тӧдӧны, мый оз позь вӧчны, сӧмын весиг и найӧ сідзи вӧчӧны: кыйсьӧны срокӧдз, лыйӧны-виӧны том пӧткаӧс. Быттьӧкӧ налы, судзсяна вежӧра йӧзлы, оз позь сытӧг овны. Найӧӧс медвойдӧр колӧ судитны, мед тӧдӧны асьныс да мед и мукӧдыслы эз вӧв пӧваднӧ.

В. С.