СЮМӦДПӦЛЬЯС

Югыд раскын, кыдз пу вужъяс улын, уна нэм нин коллялӧны Сюмӧдпӧльяс, быттьӧ низьяс — гуын. Но гожся гажа лунӧ, шондіыс кор кыдз пуяслы кӧса кылӧ, Сюмӧдпӧльяс пестеръясӧн петавлӧны ывла вылӧ. Найӧ тешкодьпырысь борӧдчӧны, быттьӧ дзуртысь пуяс, да ӧтчукӧрӧн мӧдӧдчӧны туйӧ. Кок уланыс кольӧм вося корйыс кышкӧ ^Кышкыны (диал.) — кышакывны./^. Тӧлӧн нетшкӧм сюмӧд гӧрддзым зіля ӧкмӧ пестер пытшкӧ.

Рытнас Сюмӧдпӧльяс чукӧртчӧны медся пӧрысь кыдз пуувса гӧгрӧс жырын. Сюмӧд гӧрддзым сэні шавгысьӧма джаджъяс тырыс. Выльӧн вайӧмасӧ Сюмӧдпӧльяс разьӧны да лыддьӧны став пассӧ. Сэтшӧм любӧпырысь, быттьӧ кытшлалӧны радейтана рассӧ. Выль тӧдӧмлунсӧ гижалӧны ыджыд сюмӧд небӧг лист бокъясӧ. Дыр вежӧралӧм бӧрын сӧмын тӧдӧмлуныс сюрӧ, ӧд небӧг пытшкын вывті уна юӧр.

А тӧвнас гӧрддзымъяссӧ корсьны делӧ. Дай кыдзи джуджыд лымйӧд рассӧ келан? И Сюмӧдпӧльяс лунся ноксьӧм бӧрын аддзысьӧны медваж кыдз пуувса жырныс шӧрын. Сэн найӧ видлалӧны пеша водзын сюмӧд небӧг, мед гӧгӧрвоны, кутшӧм содтӧд вежӧртасъяс сійӧ дзебӧ. Ӧд найӧ вель нин важӧн корсьысьӧны татысь, мый жӧ сійӧ кадыс. Но быттьӧ арпи гырысь синма тывйысь — помтӧг наысь пышйӧ вочакывйыс.