ГАЖТӦМ СЬЫЛАНКЫВ

Аски — гортысь мунан кад. Кык вежон лэбыштісны кык лун моз, и бара колӧ лӧсьӧдчыны мунны карӧ. А кутшӧм абу окота! Таво кежлӧ, кӧнкӧ, бӧръяысь ломта гожся керкаысь пачсӧ да пукала сыкӧд орччӧн. Лӧньын кывза билысь трачкакылӧмсӧ да кӧсъя кольны юрам тайӧ шысӧ: сійӧ сэтшӧм матысса, шоныд, сиктса, гортса. Окота горӧдлыны сьывны, мыйкӧ жугыльӧс да лывкйӧдланаӧс. Но другысь шлявкнитӧ зэр, горасьыс-гораа, да вевтыртӧ билысь шысӧ. Кӧнкӧ орчча йӧрас, буракӧ, кылӧ гажтӧм омлялӧм, а сэсся миян понным воча мӧдӧ вурзавны. Налӧн нор да нюжйӧдлана гӧлӧсыс быттьӧ ойдӧ керкаам да босьтӧ менӧ аслас кытшӧ.

Лӧня кывза тайӧ сьыланкывсӧ, кодӧс арыс козьналӧ меным чужан сикткӧд янсӧдчигӧн.