МИЧА РӦМЪЯСА КАД

Ӧшкамӧшка азыма дуньгис-юис васӧ юысь: косьтісны сійӧс жар поводдяыс да гожся зэръясыс. Ӧшкамӧшкалысь югыд рӧмъяссӧ гусьӧник чурскис ар да надзӧник баситіс вӧр-васӧ. Быд рӧмлӧн — аслас мич, быд рӧмлӧн — аслас ин. Гӧрдӧдісны кисьмӧм пелысь розъяс, сярвидзысь пув тусьяс, нэриник пипу кор. Вижовгӧрд рӧмӧн мичмӧдчисны мырпом да пелысь кор. Зарниӧ гартыштчисны кыдзьяс, пемдіс-вижӧдіс ытшкытӧм турун. Нинӧм эз вермы вӧчны ар да колис лыска пуяслы ассьыныс рӧмсӧ — турунвижӧс: ни ӧти вогӧгӧрся кад оз веж налысь пасьсӧ. А бӧръя куим рӧмнас ар юксис енэжкӧд. Асывсяньыс енвевт мавтчыліс кельыдлӧзӧ, рытланьыс — лӧзӧ, а шонді пуксигӧн малснитліс вӧртас весьтсӧ гӧрдовлӧзӧн. Тадзи ар вуджӧдіс ӧшкамӧшкалысь рӧмъяссӧ вӧр-ва вылӧ. Ӧшкамӧшкаыс бара-й кытысь аслыс мича серъяссӧ босьтіс-а?..