ПЫСТА
Тайӧ вӧлі пыстапилӧн медводдза воӧн. И заводитчис сійӧ кӧдзыда. Ылӧдчан тувсовъя шондіыс эз шонты, а сӧмын югзьӧдліс скуп югӧръяснас лэбач семьялысь ичӧтик дзескыд позсӧ. Пыстапи топӧдчыліс мамыслӧн шоныд морӧс бердас да шензьӧмпырысь кывзыліс сэтысь дугдывлытӧм шы. Сійӧ эз тӧд, мый тайӧ — сьӧлӧм тіпкӧм, олӧм шы. И бырас кӧ тайӧ шыыс, сідзкӧ, сувтас и сьӧлӧмыс, кусас олӧмыс.
Сьӧкыдӧн вӧлі тайӧ воыс пыста семьялы. Эз вермыны виччысьны шондӧдӧмсӧ пыстапилӧн чой-вокыс, кынмалісны, кӧть мамныс ставнысӧ ӧткодя шонтіс и радейтіс. А ӧтчыд эз во кыйсянінсьыс и батьыс, налӧн вердысьыс. Гажтӧм лои ичӧт позйын мама-пиалы, быттьӧ гажа шоныд тулыс пыдди воис шуштӧм кӧдзыд тӧв. Найӧ чӧвтлісны нор видзӧдласъяс орччӧн сулалысь пувывса позйын тёльӧдчысь шуда лэбачьяс вылӧ да чӧла ньылалісны курыд синва мольяс.
Тшыгъявны водзӧ эз позь — пыста-мам лэбліс корсьны номыръясӧс, а лэбачпи кольліс ӧтнас кушмӧм позйын. Кутшӧма сійӧ вежаліс тшӧтшъяясыслы, ӧд найӧ кужисны нин лэбавны! Но сылы эз позь: нэр бордъясас эз на кыв эбӧсыс. Сійӧ горшпырысь уськӧдчыліс лунтырӧн сюрӧм номыръяс вылӧ да весиг эз думыштлы, мый мамыс став сёянсӧ сетӧ сылы. Эз тӧд пыстапи: гӧль таво вӧр-ваыс, сьӧкыд судзӧдны вӧлӧгасӧ. Ӧтчыд, кор мамыс рытӧдзыс эз лок гортас, пыстапи сувтіс поз дорышас, кунис синъяссӧ и... чеччыштіс. А сэсся полӧмпырысь легнитіс тіран бордъяснас. И дугдіс усьнысӧ, мӧдіс зэв ӧдйӧ шенасьны ичӧт бордъяснас и дыр на ӧшаліс ӧти местаын. Ӧтпырйӧ сійӧ поліс и нимкодясис, окота вӧлі и серавны и бӧрдны, но эз артмы. Пыстапи велаліс лэбавны, ачыс, ӧтнас, некод сылы эз отсав. А мамыс, кӧні мамыс? Ӧд сы вӧсна и чеччыштіс позсьыс лэбачпи. Сійӧ тӧвзис корсьны мамсӧ, дыркодь на лэбаліс матігӧгӧр, а сёрӧнджык ӧти пыста висьталіс: эстӧні пӧ мамыд, турун пиас, кань пӧ сійӧс дойдӧма. Синсӧ век кежлӧ куньӧм пысталӧн морӧс вылас вӧлі нёль вир тусь. Лэбачпи топӧдчис мамыс бердӧ, но кӧдзалӧм вир-яяс эз нин тіпкы сьӧлӧмыс. Пыстапи гӧгӧрвоис: олан шыыс кӧ вошис, мамыс оз нин ловзьы. Пемдіс лолыс ичӧт лэбачлӧн.
Дыркодь на шогаліс пыстапи, а сэсся велаліс овны ӧтнасӧн. Аддзис аслыс ёртъясӧс, ӧтвылысь вердчис накӧд. Олӧмыс ладмис. А медъёна кажитчис пыстапилы лэбавны, сэки сійӧ кыліс асьсӧ медся вынаӧн, повтӧмӧн, сюсьӧн, и быттьӧ ставнас Му шарыс видзӧдіс да нимкодясис сылӧн лэбӧмӧн. Лэбачпи быдмис, верстяммис, пӧртчис мича да вына пыстаӧ. Ӧти югыд арся лунӧ сійӧ пуксис гӧрд коръяса ӧтка пу вылӧ да заводитіс сьывны: кутшӧм мича да лӧсьыд олӧмыс, кӧть и абуӧсь орччӧн муса бать-мамыс, чой-вокыс, и ставыс водзын на: лёкыс и бурыс, шогыс и шудыс. Сьылігмозыс пыста кыліс, быттьӧ сьӧлӧмсӧ вундыштіс лэчыд дой, и тӧдлытӧгыс сійӧ шмуткысис му вылӧ. Орис морӧсас олӧм ёкмыльыс, кусісны синъясыс. Бырис нӧшта ӧти олӧм. Дженьыд олӧм. Рогаткаа зонка дӧвӧльпырысь нюмдіс да котӧртіс водзӧ корсьны кутшӧмкӧ лэбачӧс.
