КОР

Лӧнь юӧд надзӧник кывтіс вижӧдӧм кыдз пу кор. Ӧтнас. Мукӧд корйыс, буракӧ, абу воӧма юӧдзыс. Либӧ кытчӧкӧ сибдӧмаӧсь туй костас. Но кор эз гажтӧмтчы. Засӧ вывлань лэптӧмӧн сійӧ надзӧник писькӧдчис водзӧ и водзӧ да шензис-нимкодясис арся вӧр-валӧн мичлунӧн. Увсяньыс тувкӧдчис чери, быттьӧ кӧсйис тӧдмавны: мыйсяма виж пӧ ва веркӧсас дзибрасьӧ. Но кор эз кыв налысь инмӧдчӧмъяссӧ, сійӧ казяліс ас кодьыс жӧ виж, но мыйлакӧ югъялысь коръяс. На дорӧ матыстчӧм бӧрын кор гӧгӧрвоис — тайӧ абу пу коръяс, тайӧ — шонді коръяс. Шондіыс кисьтіс-разӧдіс найӧс ю вылӧ, медым ӧтка корлы туяс вӧлі гажаджык. Кыдз пу кор радпырысь пырис налӧн дзирдалысь кытшӧ да быттьӧ нӧшта на югзьыштіс выль ёртъясыслӧн бисяньыс. Сійӧ гажмыштіс да кывтіс водзӧ, и чайтіс: найӧ кузяла лоӧны сыкӧд орччӧн. Но виччысьтӧг кыптіс тӧв ныр, и яръюгыд коръяс вошисны: вӧлӧмкӧ, шондісӧ ньылыштӧма кымӧр. Кыдз пу кор бара коли ӧтнас. Засӧ нора лэдзӧмӧн сійӧ водзӧ исковтіс визув ньылыд. Тӧв ныр быттьӧ тешитчис, гызьӧдіс рам юсӧ. Корлы пырысьтӧм-пыр ковмис вунӧдны шогалӧм йывсьыс да тышкасьны олӧм пондаыс. Ярмӧм гыяс то шыбитлісны сійӧс вывлань, то вӧйтлісны пузьӧм ваӧ. Зэвтіс бӧръя вынъяссӧ кор да мӧдӧдчис береглань. И берег дорас нин корйӧс кыскыштіс вабергач да кутіс гартлыны пыдӧсланьыс. Кор видліс на мездысьны да кыпӧдліс засӧ петантуй корсигмоз, но вабергач вӧйтіс сійӧс аслас пӧтлытӧм горшас.

Чери кыйысь синмыс мудзмӧн нин пукаліс ю дорын да кыйӧдіс. Час. Мӧд. Но чериыс мыйлакӧ талун эз петкӧдчы. Да и поводдяыс тшыкис. Морт мудзис да кӧсйис нин тапиктыны гортланьыс, и друг табйыс нетшыштчис ӧтчыд дай мӧдысь. Чери кыйысь кыскыштіс шатинсӧ асланьыс, но виччысяна чери пыдди ӧшаліс... кор. Вижӧдӧм кыдз пу кор. Морт сьӧлыштіс бокӧ да уськӧдіс корсӧ кок улас, а сэсся нинӧм вӧчигмоз косявліс сійӧс посни лестукъяс вылӧ. Бӧръя мӧвпнас корлӧн вӧлі: кутшӧм лӧсьыда сылы овсис чужан пу вылас.