ШОНДІ

Арся водз асыв. Пемыд. Талун ме виччыся шонді петӧмсӧ. Зарни югӧръяс поткӧдісны енэжлысь пемыд эшкынсӧ, вӧртас весьтыс ойдіс биа гӧрдӧн, коді некымын здук кежлӧ торйӧдліс енма-муасӧ, а сэсся разаліс и вошис. Ыджыд гӧрд шонді гӧгыльтчис лӧз енэж вылӧ, югзьӧдіс му вывсӧ, сэсся надзӧникӧн вежис рӧмсӧ — вижӧдіс. Кутіс ёнджыка пӧжны...

А юрам воис мӧвп: шонді петӧмыс, лун пансьӧмыс дзик жӧ муслун чужӧм кодь. Муслуныс ӧд чужӧ да югдӧдӧ став пытшкӧстӧ сӧстӧмлуннас, а сэсся вочасӧн паськалӧ да венӧ мукӧд сьӧлӧмкылӧмсӧ. Вежӧр да сьӧлӧм первойсӧ оз на воны ӧти кывйӧ, но муслуныс гартӧ найӧс ӧтилаӧ, да он и гӧгӧрво — кӧні вежӧрыс, а кӧні сьӧлӧмыс. Тайӧ шоныд кылӧмсӧ ас пытшкас новлӧдлысьыс югзьӧ тӧдлытӧм радлунысь и оз на аддзы кывъяссӧ шуны сы йылысь радейтана мортыслы.