НИСТАН

Пӧчкӧд бара на шырам баляӧс карта водзын,
Тэчӧм вуруныс юра кымӧрӧн быдмӧ дозъяс.
Он и казявлы, кыптас сынӧдас енэж соддзын.
Но ме бӧр сійӧс личка-топӧда дзескыд позъяс.

Тӧвся асылӧ унмӧй палялас дзижган шыысь:
Вӧсни тувъяса нистан мольӧдӧ дзугсьӧм вурун,
Быттьӧ сьӧкыда куртӧ вутшкӧссьӧм кушин вылысь
Тшӧкыд пиньяса куран — тӧлалӧм-косьмӧм турун.

Нистӧм вурунсӧ пӧчӧй газетъяс вылӧ тэчӧ,
Сэсся топӧдӧм могысь вылысас улӧс пуктӧ.
Сёысь видзӧдла луннас, вуруныс кор нин лэччас,
Кыдзи тулыснас помтӧг виччыся гаръяс туктӧм.

Нистан саялас джаджйӧ, уджыс кор пӧчлӧн эштас,
Пондас артавны водзӧ лун-войсӧ ыжъяс шыртӧдз.
Артмӧм вурунсӧ керка пельӧсӧ пӧчӧй вештас,
Медым шойччӧдны ӧти чукӧрын печкан пырттӧдз.