ДЖОДЖДӦРА

Джодждӧра пансигӧн кодлыкӧ гӧрддзасьӧ туй,
Став дӧра вӧньыс йитчӧны ӧтувъя серӧ,
Быттьӧкӧ нэмъяс пыр чукльӧдлысь некымын ю
Кыӧны олӧм подувлысь тыдавтӧм сюрӧс.

Стан улын джодждӧра нюжалӧ — визь бӧрся визь,
Топӧдӧ-содтӧ войвывса мусерлысь рӧмсӧ:
Мугӧмгӧрд кыа да ытшкӧм туруна видз,
Пожӧма яг да войся енэжлысь сьӧмӧс.
Джодждӧра эштӧ, и вольсасьӧ керка пос
Выль серакотша да гӧрӧдӧсь векни туйӧн.
Сы вывті тувччалӧ кага, и олӧм-ю моз
Визьяссӧ вуджӧ, быттьӧкӧ гыяс пыр уйӧ.

Верстяммӧ морт, и джодждӧра содтӧг оз ов.
Тыдавтӧм ордымӧн водзвылас тюрӧ-туӧ.
Кытӧнкӧ — сконъявлӧ, кытӧнкӧ — кыпӧдӧ лов,
Олӧмсӧ мортыслысь, сунистор быттьӧ, нуӧ.