ПОТАН

Рудзӧг рӧма потан
дзуртан лайкан помын
катликасьӧ-легӧ,
быттьӧ ветки пыж.
Потан-пыжсӧ кыскӧ
гыяс-вояс вомӧн
нэмӧвӧйся вӧтлӧн
гумыльга кодь кытш.

Тайӧ вӧтыс кывйӧн,
Важся пӧль-пӧч кывйӧн
лайкан пукӧд дзуртӧ
кагаыслы мойд.
Тайӧ вӧтыс тывйӧн,
кодзув сера тывйӧн
Енкӧласьыс ӧктӧ
ыджыд мӧвплысь войт.

Кагаыслы мӧвпыс
сьӧлӧм шӧрӧдз сӧдзӧ,
разалӧ лов пасьта
пӧль-пӧч кывлӧн вын.
Сӧмын воысь воӧ
потан-пыжыс ӧддзӧ,
кытчӧдз важся вӧтлӧн
помӧдзыс оз сын.