ПЕЧКАН

Пӧчӧй надзӧник ӧшиньыс водзын печкӧ-печкӧ,
Кужысь чуньяснас кыскӧ кудельсьыс вӧсни сунис,
Быттьӧ шондісьыс тӧвся ывлаыс югӧр пычкӧ,
Медым шонтыны сиктса войтырӧс кӧдзыд лунас.

Тайӧ печканыс, кӧнкӧ, нэм сайын кымын чужис,
Пӧрысь пӧчӧй на сыкӧд рытпукліс пеша водзас.
Пӧчлы мамсяньыс тайӧ печканыс коркӧ вуджис,
Баба рӧдныслысь печкан киподсӧ медым видзас.

Лоптыс кадысла ёна чусмӧма, быттьӧ ӧбраз,
Посни чукыръяс сайын руын моз тӧдчӧ чужӧм:
Гашкӧ, пӧчӧлӧн пӧчыс олӧм помасьӧм бӧрас
Сэтчӧ кольччис, мед тӧдны, бура-ӧ вужъясис кужӧм.

Пӧчлӧн нылыс эз чужлы — некодлы видзны удж ловсӧ,
Дзикӧдз печканыс воймис — тайкӧ лӧс пемыдын сылас.
Но быд аддзысьліг, сылысь кор малышта сарӧгӧсь лопсӧ,
Быттьӧ пӧчлысь чукырӧсь бан боксӧ киӧн кыла.