КЛЮЧ

Менам эм ыджыд ключ,
Тешкодь, дзик мойдысь быттьӧ,
Серпаса — кольча пыдди:
Изкара джуджыд чульк.

Кутшӧм и ӧдзӧс мен
Отсалас ключыс восьтны?
Изкар кӧ тӧд вылӧ босьтны,
Кутшӧм нӧ тайӧ нэм?

Но меным эз и сюр
Ключыслы буретш розьыс,
Кӧть эськӧ вель дыр корси,
Кушмытӧдз жуглі юр.

Но сэсся югыд мӧвп
Воис мен ӧти лунӧ:
Ключыслӧн туйыс мунӧ
Сэті, кӧн олӧ чӧв.

Чӧвлунас вӧйтчи кор,
Шамырті ключсӧ киам —
Лэбовті нэмъяс пиӧд,
Быттьӧкӧ йӧла гор.

Сэні мен важся кад
Вежӧрӧ тӧдӧм кӧдзис:
Кӧть кутшӧм воссяс ӧдзӧс,
Аддзан кӧ олӧм лад.