БАЛЬ-БАЛЬ-БАЛЬ!

Пӧчӧй пуис меным рок,
Лунтыр нетшкис градысь ёг.
Сэсся шойччӧдыштіс кок —
Мудзтіс сійӧс лунся нок.

Пӧчлы нинӧм ме ог шу,
Бальӧясла лэчча — жув.
Пӧчлысь коксӧ ӧд зэв жаль,
Ачым корся: «Баль-баль-баль!»

Ыджыд йӧрас ыжыс тыр,
Корсьны ковмас ой-ёй дыр.
Ныр-вом серти быдӧн — ас,
Матыстчан да — ризӧдас.

Тӧда эськӧ лыдсӧ — дас,
Кыклӧн кымӧсас — сьӧд пас.
Эз кӧ шыась ӧти ыж,
Ковмис вӧчны на сё кытш.

Дыр-ӧ-регыд кайим сэсь,
Нянь кӧрышӧй бырис весь.
Со нин воис аслам йӧр —
Радыс сьӧлӧмӧ оз тӧр.

Ӧдзӧс восьтны нин ме дась —
Грымгис-воис Трактор Вась,
Ыжъясыд тай кыдз пусь-пась!
Мустӧм трактор, сё мокасьт.

Забеднӧла бӧрддзи тан —
Синва шорӧн вазис бан.
Век на горза: «Баль-баль-баль!»
Ачым аслым — сэтшӧм жаль!

Кильчӧ вылӧ петіс пӧч:
«Тракторсьыс мӧй повзин, кӧч?
Бан бокъястӧ косӧд вай,
Аб мӧй яндзим: ай-ай-ай».

«Кыдз нӧ татчӧ ме ог бӧрд?
Пышйисны ӧд ыжъяс бӧр.
Гидад йӧрті эськӧ пыр,
Эз кӧ найӧс трактор зыр.

Пӧчӧй тан эз семды тшук,
Бураси да, чӧвтіс друг:
«Талун ыжъяс асьныс, кортӧг
Важӧн локтісны нин гортӧ».

Мый кӧть татчӧ сэсся шу,
Юр пыддиыд кӧ сісь пу.
Тайӧяслӧн ӧд эз вӧв
Пӧчӧ ыжъяслӧн кодь кӧв ^Кӧв — ыж голяын ӧшалысь пас./^!