ПӦРЫСЬ ЛЭБАЧ

Пӧрысь лэбачлӧн
	бордъясыс жебмисны,
Видзӧдласыс омӧльтчис.
Нормӧм синъясыс
	Енмыслы кевмисны,
Помлань олӧм гӧгыльтчис.

Лэбач вӧрзьывтӧг
	пу вылын пукаліс,
Пыста кельӧб казяліс.
Налӧн лэбӧмлы
	гажтӧма вежаліс,
Кыпӧдчыны зэвтчыліс.

Но эз вермы нин.
	Олӧмыс сувтӧма.
Кадыс бӧрвыв мӧдӧдчис:
Коркӧ татшӧм жӧ
	нэрӧн да синтӧмӧн
Таладорас петкӧдчис.

Коркӧ тӧв нырысь
	ӧдйӧджык лэбавліс,
Думсьыс кадкӧд ордйӧдчис.
Сӧмын лэбачлӧн
	ёнджыка ӧвтчӧмысь
Кадыс нӧшта ӧддзӧдчис.

Пӧрысь лэбачлӧн
	куньсисны синъясыс —
Мудзис кадкӧд венласьны.
Мулань ӧшйисны
	вынтӧммӧм бордъясыс —
Некытчӧ нин тэрмасьны.