КЫМЫН?

Чим сьӧд пӧв вылын
зарниӧн гижӧма сё сизим ов:
Дёмин, Ефремов, Жангуров,
Карманов, Липин, Пашнин, Попов,
Уляшев, Шомысов. Найӧ пуктісны
Ыджыд тыш дырйи ассьыныс лов.

Вежӧрӧ бура кольӧма:
обелиск дорӧ Вермӧм лунӧ
Скӧрӧдумса ичӧт школасянь
велӧдыськӧд мунӧм,
Югыдгӧрд бумагаысь
ас вӧчӧм дзоридзьяс нуӧм.

Сэні клуб водзын ставӧн кывзысям
геройяс йылысь висьтӧ.
Но уна мӧвп тыра вежӧрыд
челядьлӧн ӧдйӧ письтӧ,
И со нин тӧлыс тайӧ висьттӧ
дзоридз сыр моз муӧ кисьтӧ.

Чужан му дорйысь салдатъяслӧн
важиник керка водзӧ
ӧнія челядь ӧшлӧны
синтӧ ёран гӧрд кодзув,
Быттьӧ кыпӧдӧны енэжӧ
асланыс соддзын.

Но век жӧ кымын во
колӧ быдмыны-туны,
Кымын кольча колӧ быдтыны вежӧрад,
быттьӧкӧ пуын,
Мед сиктлысь, войтырлысь дойсӧ
сьӧлӧмнад суны?