КУВЛЫТӦМ ПОЛК

Скӧрӧдум кузя восьлалӧ Кувлытӧм полк.
Ӧвтыштлӧ сысянь сьӧлӧмтӧ топӧдан шогӧн.
Гырысь и посни мунӧны ӧтувъя могӧн:
Казьтыштны усьӧм салдатӧс, код бӧрсӧ эз лок.

Быдӧнлӧн киас — ыдждӧдӧм снимока пӧв:
Кодлӧнкӧ батьыс, кодлӧнкӧ, тыдалӧ, пӧльыс.
Пӧвъясыс костӧд жугыля лэбалӧ тӧлыс,
Разӧдны кӧсйӧ на чужӧмын зэлалӧм чӧв.

Косьӧбтӧ гудӧк, быттьӧкӧ ӧдӧбтысь гы,
Вӧрзьӧдӧ сійӧ пӧвъясысь измылӧм йӧзӧс.
Некымын здук — и чужӧмныс вирсялӧ-ӧзйӧ,
Матысмысь гым моз гораммӧ-содӧ кок шы.

Копыртчӧ полклы туй бокын зымвидзысь коз.
Томиник пуӧн аддзыліс ӧти лунӧ
Фронт вылӧ первойысь мӧдӧм зонъяслысь мунӧм...
Колльӧдіс ӧні войтырӧс пӧрысь мам моз.