ЙӦР

Карса йӧръясӧд инасьтӧм лэбач моз помтӧг жӧдза,
Меным тані оз нюмды ни шыасьлы тӧдтӧм пу.
Ӧткодь керкаяс — ставнысӧ кисьтӧма ӧти лу,
Сэтшӧм веськодьӧсь, весигтӧ видзӧдлас налӧн кӧдзыд.

Синмӧс куня да веськала бать-мамлӧн керка дорӧ,
Лов шы кутӧмӧн кытшовта паськыда водӧм йӧр.
Сэсся пыдіа лолышта юммӧдан сынӧд кӧр,
Сьӧлӧм пасьтала ойдӧдас тільгунлӧн гажа горӧн.

Киӧн инмӧдча пӧрысьмӧм керкалӧн варччӧм серӧ —
Менӧ юр вывсянь кок улӧдз упкӧбтас дзирыд вын,
Быттьӧ исковтас сӧнъясӧд тувсовъя шонді ынь.
Керка меліа вашмунас меным быд костӧн-керӧн.

Ньӧжйӧ малышта кӧбрегӧс нитшсялӧм гӧгрӧс юрӧд,
Крука бедьторйӧн вештышта тшупӧда гуся тас —
Бӧрӧ визувтысь важыслӧн дзебасӧ кольӧм пас.
Он и казявлы, пемыдас изки моз коркӧ тюрӧ.

Важся тӧдса моз нюмдыштас увтасӧ сувтӧм пывсян,
Вильыш пельсаысь виччысьтӧг койыштас кӧдзыд ва,
Быттьӧ вылысам сырмӧдан лысваыс киссяс шарк
Зэрӧн мыськалӧм-мольӧдӧм кӧсаа кыдз пу вывсянь.

Синмӧн тывъяла йӧрнымӧс кытшалысь гажа ывла,
Колип чивгӧмӧн долыда шыасяс муса сад.
Сійӧ тӧлын кӧть гожӧмын аддзысьны мекӧд рад.
Шоныд лов шысьыс нэриник лым чирйӧн соддзас сыла.

Гортад олӧмыс дзулькйӧ да турун моз вежӧдӧ нюдза,
И ас керка дор ывлаыс сійӧн и шусьӧ йӧр,
Мый кӧть карса коромина кузьта ни пасьта оз тӧр,
Сӧмын татӧні енкӧла пыдӧсӧ изла судзан.