ЫДЖЫД КӦШ

Рытнас пета пывсянысь да дуда:
Енэж пасьталаыс кодзув дзирд.
Тайӧ здукас мыйлакӧ ме шуда.
Весиг ӧддзӧ сӧнъяс кузя вир.

Медся ёна кыскӧ менсьым синмӧс
Ыджыд кӧшлӧн тшапитчытӧм сер.
Сылӧн вугйӧ киӧй муртса инмӧ —
Муас киссьӧ зильган эзысь зэр.

Зэрыс мыськӧ менӧ, керка, садӧс,
Ӧти войттор весьшӧрӧ оз вош.
Муыс мӧдас югзьыны са сьӧдас,
Быттьӧ эзысь чиръяс ӧктӧм пож.

Мукӧд кодзув чукӧр тадз оз ылӧд,
Ыджыд кӧш моз радлунсӧ оз вай.
Туйкостъяс да вояс пыр ме вылӧ
Киссьӧ пывсян пельсаысь сӧдз ва.