ИЧӦТ ПРИНЦ

Челядьдырыд — чужан сиктса ӧзын,
И кӧть мыйта сэні тэ он уй,
Сійӧ сылас, быттьӧ енэж лӧзын
Самолётӧн кольӧм руа туй.

И он ӧкты вӧрысь тусьӧн-тусьӧн,
И видз вылысь чышъянӧн он кут.
Пышъяс тэысь шурыд юрсигусьӧн.
Вӧлі тан — и абу. Пукты чут!

Но мен сэтшӧм ёна ӧні колӧ
Челядьдырӧ веськавлыны бӧр,
Медым выльысь казьтыштны став олӧм,
Выльысь гартны дзугсялыштӧм шӧрт.

Сэтчӧ вермас вуджӧдлыны менӧ
Сӧмын Ичӧт принц — и некод мӧд.
Сылӧн сьӧлӧм верстьӧ мортлысь венӧм,
Пӧръясьлӧм да чорыдлун оз тӧд.

Сӧмын кутшӧм муысь принцӧс корсян?
Кыті сійӧ вуджӧ — сикт ли кар?
Туйвизьсӧ он тӧдмав — пыр и ворссян.
Он ӧд сэсся кытшовт став Му шар?

Батьлысь самолётсӧ принцла ыста —
Веськӧдас мед лёталӧм пу борд.
Челядьдырся чачаыдкӧд лысьтас
Воны верстьӧ дорӧ ичӧт морт.

Но пу лэбач воис ӧтнас. Бӧрас
Сійӧ вайис кыа рӧма шарп.
Муас плавгис быттьӧкӧ тӧвдӧра —
Чужан сиктын чагйӧн ӧзйис ар.

Рӧмпӧштан моз потіс уна пельӧ
Кыа визьӧн пестӧм енэж йир.
Вошис йирас нора горзысь кельӧб —
Ланьтіс челядьдырӧ ӧдзӧс дзир.